17956

पडेल येथे ग्रामीण रुग्णालय व्हावे

सरपंच पोकळे ः आमदार नीतेश राणेंना निवेदन

सकाळ वृत्तसेवा
देवगड, ता. ९ ः पडेल (ता.देवगड) येथील प्राथमिक आरोग्य केंद्राचे रुपांतर ग्रामीण रुग्णालयात करण्यात यावे. यामुळे परिसरातील गावांमधील रुग्णांची व्यवस्था होईल, अशी मागणी पडेल सरपंच भूषण पोकळे यांनी आमदार नीतेश राणे यांच्याकडे निवेदनाद्वारे केली.
तालुका दौऱ्यावर आलेल्या आमदार राणे यांना आरोग्य सुविधेच्या अनुषंगाने निवेदन देण्यात आले. यावेळी बाळ खडपे, जिल्हा सरचिटणीस संदीप साटम, भाजप पडेल मंडल अध्यक्ष महेश उर्फ बंड्या नारकर, विजयदुर्ग प्रभारी सरपंच रियाज काझी आदी उपस्थित होते.
निवेदनात म्हटले आहे की, पडेल येथे प्राथमिक आरोग्य केंद्र आहे. या आरोग्य केंद्रात पंचक्रोशीतील रुग्ण उपचारासाठी येतात. या आरोग्य केंद्राला जोडणारी तालुक्यातील विजयदुर्ग, रामेश्वर, गिर्ये, पुरळ, वाडा, पडेल, तिर्लोट, सौंदाळे, वाघोटण आदी गावे आहेत. या व्यतिरिक्त राजापूर तालुक्यातील सागवे पंचक्रोशीतील काही गावांसाठी पडेल प्राथमिक आरोग्य केंद्र सोयीचे ठरते. सद्यस्थितीत आरोग्य केंद्रातील गैरसोयींमुळे प्रसुतीसाठी गरोदर महिलांना देवगड येथे जावे लागते. हे अंतर काही गावांना १५ तर काही गावांना ३० किलोमीटर एवढे पडते. ही समस्या दूर होण्यासाठी पडेल येथे ग्रामीण रुग्णालयाची आवश्यकता आहे. यामुळे पंचक्रोशीतील विजयदुर्ग ते वाघोटणपर्यंतच्या रुग्णांची सोय होईल. त्यामुळे पडेल येथे ग्रामीण रुग्णालय होण्याची मागणी आहे. दरम्यान, याबाबत सकारात्मक निर्णय घेण्यात येईल, असे आमदार राणे यांनी आश्‍वासित केले.