25697

आचऱ्यात कार्तिकोत्सवाची
दहीहंडी सोहळ्याने सांगता

सकाळ वृत्तसेवा
आचरा, ता. १७ ः संस्थान आचरा गावच्या गेला महिनाभर सुरू असलेल्या कार्तिकोत्सवातील पालखी सोहळ्याची सांगता शुक्रवारी (ता. १५) रात्री दीपोत्सवाने झाली. पहाटे सुरू असलेल्या काकड आरतीची सांगता दहिहंडी फोडून करण्यात आली.
त्रिपुरारी पौर्णिमेची सायंकाळ संगीत अलंकार प्रा. केशवराव गाडेकर (पुणे) यांच्या गायनाने अविस्मरणीय ठरली. संस्थान आचरे गावचा सर्वांत मोठा उत्सव म्हणून कार्तिकोत्सव ओळखला जातो. कोजागिरी पौर्णिमा ते त्रिपुरारी पौर्णिमा असा महिनाभर हा उत्सव चालू असतो. यात रात्री पालखी सोहळा तर पहाटे विठ्ठल मंदिरात काकड आरती रंगते. कार्तिक दशमीला आचरा वरचीवाडी येथील नारायण मंदिराला व कार्तिक एकादशीला देवूळवाडी येथील विठ्ठल मंदिराला श्री विष्णू विराजित पालखीभेट दिली होती. यावेळी भाविकांची गर्दी उसळली होती. त्रिपुरारी पौर्णिमेला पावसाचे सावट असतानाही भाविकांचा उत्साह उल्लेखनीय होता. रात्री रामेश्वर मंदिर आणि दीपमाळा आकर्षक फुलांनी सजवून दीपोत्सव साजरा करण्यात आला. ठराविक वेळीच होणारे पंचमुखी महादेवाचे दर्शन त्रिपुरारी पौर्णिमेदिवशी होत असल्याने दर्शनासाठी भाविकांची रिघ लागली होती. पहाटे विठ्ठल मंदिरातील काकड आरतीला प्रदक्षिणेनंतर पावल्यांचा फेर धरून दहिहंडी फोडून या सोहळ्याची सांगता करण्यात आली. यावेळी भाविकांची गर्दी उसळली होती.