२५८३९

नडगिवे घाटीत कंटेनर उलटला
चालक गंभीर जखमी ः नियंत्रण सुटल्याने घटना
सकाळ वृत्तसेवा
तळेरे, ता. १७ : मुंबई-गोवा राष्ट्रीय महामार्गावर खारेपाटण नजीक नडगिवे घाटीत एका अवघड वळणावर मासळी नेणारा कंटेनर पलटी होऊन अपघात झाला. या अपघातात चालक गंभीर जखमी झाला. हा अपघात आज सकाळी ८ वाजण्याच्या सुमारास झाला.
याबाबत अधिक माहिती अशी की, महामार्गावरील नडगिवे घाटीतील अवघड वळणावर मासळीने पूर्ण भरलेला १८ चाकी मोठा कंटेनर (एमएच ४६ सीएल १३४१) चालकाचे गाडीवरील नियंत्रण सुटल्याने पलटी झाला. या वळणावरून सुमारे २०० मीटरपर्यंत कंटेनर फरफटत गेला. या अपघातात चालक शेशनाथ चव्हाण (वय ३५, रा. उत्तरप्रदेश) हा गंभीररित्या जखमी झाला. कंटेनरचेही मोठे नुकसान झाले. या अपघाताबाबत नडगिवे गावचे पोलिसपाटील जितेंद्र मण्यार यांनी खारेपाटण पोलिस ठाण्याला माहिती दिली. अपघाताची माहिती मिळताच तातडीने खारेपाटण चेकपोस्टचे पोलिस अंमलदार चंद्रकांत माने यांनी घटनास्थळी तातडीने भेट दिली. जखमी वाहनचालक शेशनाथ चव्हाण याला १०८ रुग्णवाहिकेने ओरोस जिल्हा रुग्णालय येथे उपचारांकरिता पाठविले. महामार्ग वाहतूक पोलिस एएसआय देसाई, देवेंद्र जाधव, संकेत चिंदरकर यांनी घटनास्थळी भेट दिली व अपघाताची पाहणी केली. अधिक तपास खारेपाटण पोलिस चेकपोस्टचे कर्मचारी करीत आहेत.