दापोलीत ३९१ केंद्रांवर आज मतदान

प्रशासन यंत्रणा सज्ज ; १७२४ कर्मचाऱ्यांची नियुक्ती
सकाळ वृत्तसेवा
खेड, ता. १९ ः दापोली मतदारसंघातील निवडणुकीसाठी प्रशासनाकडून जय्यत तयारी झाली आहे. उद्या (ता.२०) प्रत्यक्ष मतदान होऊन २३ नोव्हेंबरला डॉ. बाळासाहेब सावंत कोकण कृषी विद्यापीठाच्या सर विश्वेश्वरय्या सभागृहात मतमोजणी होणार आहे. या निवडणुकीत ३९१ मतदान केंद्रे असणार आहेत, तर १ लाख ३९ हजार ८९५ पुरुष व एक लाख ५१ हजार ४०२ स्त्रिया असे मिळून २ लाख ९१ हजार २९७ मतदार आपला मतदाराचा हक्क बजावणार आहेत.
या निवडणुकीमध्ये ३० ऑगस्टपासून ६००४ मतदारांची संख्या वाढलेली आहे. या निवडणुकीसाठी १७२४ कर्मचाऱ्यांची नियुक्ती करण्यात आलेली आहे. या निवडणुकीत ८५ वर्षांवरील ३५६०, तर १६०९ दिव्यांग मतदार मतदान करणार आहेत. निवडणुकीसाठी ४७० ईव्हीएम मशीन असणार आहेत. निवडणुकीसाठी ५७ एसटीच्या गाड्या, तर तीन मिनीबसची व्यवस्था करण्यात आलेली आहे. या निवडणुकीत ९३० जणांनी गृहमतदानाचा पर्याय निवडलेला आहे. याकरिता ४२ पथकांची नियुक्ती आलेली आहे. निवडणुकीत ५६९७ नवमतदार आपला निवडणुकीचा हक्क बजावणार आहेत.