बांग्लादेशीयांविरुद्ध जिल्ह्यात शोध मोहीम

धनंजय कुलकर्णी; अन्य भागांतही असण्याचा संशय

रत्नागिरी, ता. २९ : जिल्ह्यात घुसखोरी करणाऱ्या बांग्लादेशीय नागरिकांविरुद्ध पोलिसांनी कारवाईचा फास आवळला आहे. जिल्ह्यात अन्य ठिकाणी हे नागरिक असण्याचा संशय आहे. त्यामुळे चिपळूण, रत्नागिरीतील नाखरे येथे बांग्लादेशी नागरिकांवर कारवाई झाल्यानंतर जिल्ह्यातील प्रत्येक भागात बांग्लादेशी घुसखोरांविरुद्ध शोध मोहीम राबविली जाणार आहे. त्यासाठी पोलिसांच्या विशेष पथकाची नियुक्ती केली जाणार आहे, अशी माहिती पोलिस अधीक्षक धनंजय कुलकर्णी यांनी दिली.
जिल्ह्यातील चिपळूण तालुक्यात घुसलेल्या बांग्लादेशींवर पोलिसांनी कारवाई केली होती. त्यानंतर पोलिसांच्या खबऱ्याने दिलेल्या माहितीवरून रत्नागिरी तालुक्यातील नाखरे येथे एका आंबा व्यापाऱ्याकडे बांग्लादेशी घुसखोर कामाला असल्याचे पुढे आले. मध्यरात्री पोलिसांनी छापा टाकून बांग्लादेशी घुसखोरांना ताब्यात घेतले होते. त्यांच्यावर कारवाई करत त्यांची पोलिस कोठडीत व त्यानंतर न्यायालयीन कोठडीत रवानगी करण्यात आली आहे. या बांग्लादेशीय नागरिकांकडे कोणतीही कागदपत्रे नव्हती. एका एजंटद्वारे जिल्ह्यात दाखल झाल्याचे तपासात पुढे आले होते.
जिल्ह्यातील अन्य भागांतही बांग्लादेशी घुसखोर असल्याची शक्यता वर्तवली जात आहे. जिल्हा बांग्लादेशी घुसखोरमुक्त करण्यासाठी जिल्हा पोलिसांनी विशेष पथकाची स्थापना करण्याची तयारी केली आहे. या पथकाद्वारे संशयास्पद भागात सर्च ऑपरेशन राबविण्यात येणार आहे. ज्या भागात यापूर्वीच बांग्लादेशींचे वास्तव्य होते त्या भागावर अधिक लक्ष केंद्रित केले जाणार आहे. ज्या नागरिकांना बांग्लादेशी घुसखोरांसंदर्भात माहिती आहे त्यांनी ती जिल्हा पोलिसांना द्यावी, असे आवाहन कुलकर्णी यांनी केले आहे.
-------
चौकट...
बांग्लादेशात धाडणार
रत्नागिरी तालुक्यातील नाखरे येथे १३ बांग्लादेशीय चिरेखाणीवर काम करताना आढळून आले. या बांग्लादेशीयांबाबत शासनाला माहिती दिली आहे. शासनाच्या मार्गदर्शनानंतर त्यांच्यावर पुढील कारवाई करून त्यांना बांग्लादेशात परत पाठविले जाणार आहे.