निवृत्त पोलिस हत्‍याप्रकरणी
संशयिताला पोलिस कोठडी

सकाळ वृत्तसेवा
कणकवली, ता.२९ : निवृत्त पोलिस उपनिरीक्षक विनोद आचरेकर यांच्या हत्‍या प्रकरणातील संशयित सिद्धीविनायक पेडणेकर याला कणकवली न्यायालयाने आज पाच दिवसांची पोलिस कोठडी सुनावली.
पोलिसांकडून मिळालेल्या माहितीनुसार, संशयित सिद्धीविनायक पेडणेकर याने २७ नोव्हेंबरच्या रात्री साडेअकराच्या सुमारास विनोद आचरेकर यांची डोक्‍यावर कुदळ मारून हत्‍या केली होती. त्‍यानंतर गुरुवारी (ता.२८) सकाळीच संशयित पेडणेकर याला कणकवली पोलिसांनी ताब्‍यात घेतले होते. त्‍याला आज न्यायालयात हजर केले असता खुनाच्या अधिक तपासासाठी ३ डिसेंबरपर्यंत पोलिस कोठडी सुनावण्यात आली. आपल्यावर जबरदस्ती केल्‍याने आचरेकर यांच्या डोक्‍यात कुदळ मारल्‍याची कबूली संशयित पेडणेकर याने दिली आहे. तरीही या खुनामागे मालमत्ता वाद, वैयक्‍तिक भांडण किंवा अन्य काही कारणे आहेत का? या दृष्‍टीने तपास केला जात असल्‍याची माहिती पोलिसांकडून देण्यात आली.