जगबुडी नदीकिनारी कचऱ्याचे ढीग
सकाळ वृत्तसेवा
खेड, ता. ७ : खेड पालिका कचरामुक्त शहरासाठी स्वच्छ सर्वेक्षण मोहीम गतिमान करत आहे; मात्र दुसरीकडे जगबुडी नदीकिनारी पुन्हा कचरा टाकत पालिकेच्या सूचनांना हरताळ फासण्याचा प्रकार नागरिकांकडून सुरू आहे. नजर चुकवून जगबुडी नदीकिनारी वाहनचालकांकडून कचरा टाकला जात आहे. यामुळे पुन्हा कचऱ्याचे ढीग जगबुडी नदीकिनारी निदर्शनास येत आहेत.
मुख्याधिकारी महादेव रोडगे यांच्या मार्गदर्शनाखाली एकीकडे पालिका कचरामुक्त शहरासाठी झटत आहे; मात्र नागरिकांनी पालिकेच्या सूचनांकडे दुर्लक्ष करत सूचनाफलक लावलेल्या ठिकाणीच कचरा टाकण्यास सुरवात केली आहे. कचरा टाकणाऱ्यांवर दंडात्मक कारवाईचा बडगा उगारण्याची तंबी देण्यात आली होती. त्यानंतर नदीकिनारी कचरा टाकणे थांबले होते; मात्र आता पुन्हा कचरा टाकण्याचे प्रकार सुरू झाले आहेत. यामुळे नदीकिनारी पुन्हा कचऱ्याचे ढीग आहेत.
----