- rat११p२९.jpg-
P२४N३०९१३
रत्नागिरी ः संकटकाळात मदत करण्यासाठीचे प्रात्यक्षिक करून दाखवताना एनडीआरएफ आणि कोकण रेल्वेची टीम.
-----------
एनडीआरएफ, कोकण रेल्वेची प्रात्यक्षिके

रेल्वे बोगी पूर्ववत करण्याचे धडे ; अत्याधुनिक उपकरणाचा वापर

सकाळ वृत्तसेवा
रत्नागिरी, ता. ११ ः कोकण रेल्वे मार्गावरून खाली उतरलेल्या रेल्वे बोगीला पूर्ववत मार्गावर आणण्यासह अत्याधुनिक उपकरणाच्या साह्याने रेस्क्यू ऑपरेशन कसे केले जाते, याचे प्रात्यक्षिक दाखवण्यात आली. एनडीआरएफ आणि कोकण रेल्वेच्या टीमने रत्नागिरी रेल्वेस्थानकात करून दाखवले. अशा आपत्कालीन स्थितीत तत्काळ निर्णय घेत त्यावर मात करणे सोपे जाणार आहे.
कोकण रेल्वेच्या रत्नागिरी स्थानकात झालेल्या या प्रात्यक्षिकावेळी जिल्हा प्रशासनातील विविध खात्यांचे कर्मचारी, अधिकारी उपस्थित होते. आपत्कालीन स्थिती निर्माण झाली तर सर्वप्रथम जिल्हा प्रशासनाच्या विविध विभागांना सतर्क करावे लागते. परिस्थिती गंभीर असेल तर अशा स्थितीत एनडीआरएफच्या टीमला पाचारण केले जाते. नुकतीच एनडीआरएफच्या एका टीमने रत्नागिरी जिल्ह्याला भेट देत कोकण रेल्वेसह विविध विभागातील कर्मचारी आणि अधिकाऱ्यांसमोर विविध प्रात्यक्षिके सादर केली. कोकण रेल्वेच्या रत्नागिरी विभागीय कार्यालयाच्यावतीने आयोजन केले होते. एनडीआरएफच्या पथकाने कोकण रेल्वेच्या परिसरात आपत्कालीन स्थितीत त्यांची टीम कशा पद्धतीने काम करते, अडचणीच्या ठिकाणी अडकलेल्या व्यक्तीची कशी सुटका करते आणि त्यांना उपचारासाठी पाठवले जाते याची प्रात्यक्षिके सादर केली. कोकण रेल्वेच्या कर्मचाऱ्यांनीही या वेळी प्रात्यक्षिके दाखवली. या वेळी जिल्हा प्रशासनचा आपत्कालीन विभाग, तहसीलदार कार्यालय, नगरपालिका अग्निशमन पथक, जिल्हा आरोग्य विभाग, नागरी संरक्षण दल, पोलिस दल, रेल्वे सुरक्षादलाचे जवान असे विविध विभागाचे कर्मचारी उपस्थित होते. या प्रसंगी कोकण रेल्वेच्यावतीने रेल्वेचे मुख्य संरक्षा अधिकारी नंदू तेलंग व उपमुख्य संरक्षा अधिकारी बी. जी. मदनायक, विभागीय व्यवस्थापक शैलेश बापट यांनी एनडीआरएफचे वरिष्ठ अधिकारी राजू गौड व जवानांचे स्वागत केले. एनडीआरएफचे २५ जवान या प्रात्यक्षिकांमध्ये सहभागी झाले होते.
---
परस्पर समन्वयावर बैठकीत चर्चा
कोकण रेल्वेच्या विभागीय कार्यालयात एनडीआरएफ आणि विविध खात्यातील अधिकाऱ्यांची विशेष बैठक झाली. त्यामध्ये आपत्कालीन स्थितीत निर्माण होणारी स्थिती, घ्यायचे निर्णय, खात्यांमधील परस्पर समन्वय यावर चर्चा करण्यात आली तसेच समन्वयाने काम करण्याबाबत चर्चा झाली.