31380

परभणीतील घटनेचा सावंतवाडीत निषेध
प्रांताधिकाऱ्यांना निवेदनः देशद्रोहाचा गुन्हा दाखल करण्याची मागणी
सकाळ वृत्तसेवा
सावंतवाडी, ता. १३ः परभणी येथे भारतीय संविधानाची समाजकंटकाकडून झालेली विटंबना आणि त्यातून आंबेडकर अनुयायांचा घडलेला उद्रेकाच्या घटनेचा आज सावंतवाडीतील आंबेडकर अनुयायांनी शांततेत एकत्र येत तीव्र निषेध केला. अशा विकृत प्रवृत्तींवर देशद्रोहाचा गुन्हा दाखल करावा, अशी मागणी प्रांत अधिकारी हेमंत निकम यांना दिलेल्या निवेदनातून त्यांनी केली.
परभणी येथील आंबेडकर पुतळ्यानजीक असलेल्या कोरीव भारतीय संविधानाची एका समाजकंटकाने विटंबना केल्याने आंबेडकरी अनुयायांनी एकत्र येत बुधवारी मोर्चा काढला होता. या मोर्चाचे रूपांतर आंदोलनात होऊन मोठी जाळपोळ झाली होती. या घटनेचे पडसाद संपूर्ण राज्यातही उमटले होते. सावंतवाडीसारख्या शांत शहरात अशा घटना घडू नये व शांतता अबाधित राहण्यासाठी आंबेडकरी अनुयायांसह भारतीय संविधान प्रेमींनी एकत्र येत या घटनेवर सविस्तर चर्चा करून या घटनेचा तीव्र निषेध व्यक्त केला. अशा समाजकंटकाला कठोर शिक्षा करावी व अशा घटना पुन्हा पुन्हा राज्यात घडणार नाही याची दक्षता शासनाने घ्यावी, असे मागणी त्यांनी निवेदनातत केली आहे.
या निवेदनावर सुमारे १०० संविधान प्रेमींच्या सह्या असून ज्येष्ठ पत्रकार मोहन जाधव यांच्या नेतृत्वाखाली प्रांत अधिकारी निकम यांना हे निवेदन देण्यात आले. यावेळी रवी जाधव, वासुदेव जाधव, मिलिंद नेमळेकर, लाडू जाधव, ॲड. सगुण जाधव, भावना कदम, मंगेश जाधव, के. व्ही. जाधव, के. जाधव, सुरेश कारविडेकर इत्यादी आंबेडकरी अनुयायी उपस्थित होते.