-rat१३p२८.jpg-
P२४N३१४५२
दापोली ः हर्णै बंदरातील नौकांवर ट्रान्सपॉन्डर बसवण्याचे काम सुरू झाले आहे.
----------
हर्णै बंदरातील नौकावर बसवले ‘ट्रान्सपॉन्डर’

मच्छीमारांना मिळणार तात्काळ मदत ; ५२५ उपकरण उपलब्ध
सकाळ वृत्तसेवा
दापोली, ता. १३ ः मासेमारी करणारे मासेमारीसाठी खोल समुद्रात जात असतात. अनेकदा समुद्रात अचानकपणे आपत्कालीन परिस्थिती उद्भवते. त्यामुळे खोल समुद्रात मासेमारीसाठी गेलेल्या मच्छीमारांच्या सुरक्षिततेसाठी मच्छीमारांना तत्काळ मदत मिळावी, या उद्देशाने मासेमारी नौकांवर ट्रान्सपॉन्डर उपकरण बसवण्याच्या कामाचा प्रारंभ करण्यात आला.
हर्णै बंदरात साधारणपणे लहान-मोठ्या ८५० मासेमारी करणाऱ्या परवानाधारक नौका आहेत. यापैकी ६ सिलिंडरच्या नौकांवर ट्रान्सपॉन्डर हे उपकरण बसवण्याच्या कामाला सुरवात झाली आहे. आपत्कालीन परिस्थितीत जसे की, आग लागणे, नौकेचे इंजिन खराब झाल्यास नौका समुद्रात बुडत असल्यास नौकांवर, खलाशांना वैद्यकीय मदत लागल्यास या उपकरणाद्वारे संदेश पाठवता येतो. त्यामुळे मदत मिळण्यास सोपे होते. ट्रान्सपॉन्डर उपकरणामध्ये असलेले आपत्कालीन बटन हे थेट नियंत्रण कक्षाशी संपर्क करते. त्यामुळे नियंत्रण कक्षाला बोटीच्या समुद्रातील स्थळासह अलर्ट प्राप्त होतो व त्यानुसार नौकेवरील नभमित्र अॅपद्वारे नियंत्रण कक्षाकडून संदेश प्राप्त होतो.
ट्रान्सपॉन्डर उपकरण बसवणे हे नौकामालक तसेच मासेमारी खलाशी यांच्या सुरक्षिततेच्यादृष्टीने अतिशय महत्वाचे आहे. हर्णै बंदरातील नौकांवर ट्रान्सपॉन्डर बसवण्याचे काम सुरू झाले आहे. नौकांवर बसवण्यासाठी ५२५ ट्रान्सपॉन्डर उपकरण उपलब्ध झाले आहेत. हर्णैनंतर दाभोळ आणि त्यानंतर बुरोंडी येथील नौकांवर बसवण्यात येणार आहे, असे सहाय्यक मत्स्य व्यवसाय विकास अधिकारी दीप्ती साळवी यांनी सांगितले.
--------
कोट
कोणतीही तत्कालीन सेवा मिळवण्यासाठी हे उपकरण खूपच नौकांसाठी उपयुक्त आहे. शासनाकडून सर्वच नौकांना ही मोफत सुविधा पुरवली जात आहे. यामुळे नौकांना कितीही दूरवर मासेमारीकरिता गेले असता चांगलाच फायदा होऊ शकतो.
-अनंत चोगले, मच्छीमार, हर्णै