गणेशगुळेतील वाळू उपशावरील
आक्षेप राजकीय ः तोडणकर

स्थानिक ग्रामस्थांना वापरण्यास परवानगी
सकाळ वृत्तसेवा
पावस, ता. १३ ः गणेशगुळे गावातील गुळेकरवाडीमार्गे गेली अनेक वर्षे समुद्रामधून वाळू काढून सर्व परिसरात विकली जात असल्याची चर्चा आहे. मात्र यासंदर्भात उपसरपंच प्रसाद तोडणकर यांच्याशी संपर्क साधला असता त्यांनी या परिसरातील किनाऱ्यावरील वाळू स्थानिक ग्रामस्थांना वापरण्यास परवानगी असल्याचे सांगितले. याबाबतचा ठराव यापूर्वी ग्रामपंचायतीत करण्यात आल्याचे त्यांनी सांगितले.
या वाळू उपशाकडे प्रशासन दुर्लक्ष करत असल्याची चर्चा सुरू होती. तसेच यावर कारवाई करण्याची मागणीही केली जात होती. याबाबत तोडणकर म्हणाले, गणेशगुळे किनाऱ्यावरील वाळू गावातील स्थानिक ग्रामस्थांना वापरण्यास परवानगी आहे. असा ठराव यापूर्वी ग्रामपंचायतीत करण्यात आलेला आहे. त्यामुळे तेथील वाळू चोरी करून घेण्याचा प्रश्न उद्भवत नाही किंवा ती विकली जात नाही. असा प्रकार गेली अनेक वर्ष सुरू असून फक्त स्थानिक ग्रामस्थांना आवश्यक असेल तेवढीच वाळू त्यांनी आपल्या बांधकामासाठी वापरायची, असा ठराव ग्रामसभेत झाला आहे. त्यामुळे वाळू चोरीचा प्रकार उद्भवत नाही. काही लोक राजकीय फायदा उठवण्यासाठी या गोष्टीचा वापर करत असल्याचेही तोडणकर यांनी सांगितले.