पावस एज्युकेशन सोसायटीला विजेतेपद

उर्दू माध्यम शाळांसाठी स्पर्धा ; १६० विद्यार्थ्यांचा सहभाग
सकाळ वृत्तसेवा
पावस, ता. ७ ः रत्नागिरी-सिंधुदुर्ग जिल्ह्यातील उर्दू माध्यमाच्या शाळा आणि कनिष्ठ महाविद्यालयांसाठी विविध शैक्षणिक स्पर्धा पावस एज्युकेशन सोसायटीच्या शैक्षणिक संकुलात झाल्या. या स्पर्धांमध्ये उर्दू माध्यमाच्या विविध शाळांमधून एकूण १६० विद्यार्थ्यांनी सहभाग घेतला. पावस एज्युकेशन सोसायटी संचलित जुलेखा दाऊद काजी हायस्कूल, मुराद उमर मुकादम व राबिया शेख अहमद नाखवा कनिष्ठ महाविद्यालय आणि ए. ई. कालसेकर प्रीप्रायमरी अँड प्रायमरी स्कूलच्या विद्यार्थ्यांनी एकूण सात बक्षिसे पटकावून १६ गुणांसह सर्वसाधारण विजेतेपद पटकावले. आयडियल फाउंडेशन मुंबईची शैक्षणिक शाखा कोकण टॅलेंट फोरमच्या वतीने या स्पर्धांचे आयोजन करण्यात आले होते.
या स्पर्धेमध्ये उमैमा सरफराज गावखडकर (प्रथम, वादविवाद स्पर्धा), अस्मिना शराफत दर्वेश (प्रथम, उर्दू निबंध लेखन), फिरदोस इमरान गावखडकर (प्रथम, बुद्धिमत्ता), नवमान नजीर अहमद कोल्हार (प्रथम, बुद्धिमत्ता प्राथमिक), जमील अहमद अतीक फोंडू (द्वितीय, वक्तृत्व), मारिया जाबीर पावसकर (द्वितीय, इंग्रजी व्याकरण), उमेरा मोहसीन काझी (उत्तेजनार्थ, इंग्रजी निबंध लेखन).