लोगो
बांगलादेशीचा रत्नागिरीत जन्म

तत्कालीन ग्रामसेवकाची चौकशी
जिल्हाधिकाऱ्यांकडून गंभीर दखल ः शिरगाव ग्रामपंचायतीचे दप्तर तपासले
सकाळ वृत्तसेवा
रत्नागिरी, ता. ७ : बांगलादेशी नागरिकाला शिरगाव ग्रामपंचायतीतून जन्मदाखला दिल्याप्रकरणी तत्कालीन ग्रामसेवकाची जिल्हाधिकारी एम. देवेंदर सिंह यांनी चौकशी केली. या गंभीर प्रकरणामध्ये जिल्हाधिकारी सिंह यांनी लक्ष घातले आहे. ग्रामपंचायतीचे दप्तर तपासले. कोरोना काळामध्ये मे २०२० मध्ये हा जन्मदाखला दिल्याचे दिसत आहे. त्यामुळे चौकशीनंतर संबंधितांवर कारवाई केली जाईल, असे सिंह यांनी सांगितले.
मुंबई पोलिसांना एका गुन्ह्यात बांगलादेशी संशयित आरोपी सापडला आहे. त्याच्या चौकशीनंतर या प्रकरणाची पाळेमुळे रत्नागिरी तालुक्यातील शिरगाव ग्रामपंचायतीशी जोडल्याचे उघड झाले आहे. याबाबत मुंबई पोलिसांनी शिरगाव ग्रामपंचायतीला नोटीस दिली असून, या गंभीर प्रकरणाची चौकशी सुरू झाली आहे. मोहम्मद इद्रीस इसाक शेख या बांगलादेशी नागरिकाला शिरगाव ग्रामपंचायतीतून जन्म दाखला दिल्याची नोंद आहे. त्यामुळे तत्कालीन ग्रामसेवक आणि स्थानिक लोकप्रतिनिधींची चौकशी सुरू आहे. या प्रकरणाबाबत संबंधित ग्रामपंचायतीची गटविकास अधिकाऱ्यांमार्फत चौकशी लावली आहे. त्याचा अहवाल आल्यानंतर यामध्ये काय तथ्य आहे हे स्पष्ट होईल, अशी माहिती सोमवारी जिल्हा परिषदेचे मुख्य कार्यकारी अधिकारी कीर्तीकिरण पुजार यांनी दिली होती.
कलम १७९ भारतीय नागरिक सुरक्षा संहिता २०२३ अन्वये कलम ३५ (तीन) भारतीय नागरिक सुरक्षा संहिता २०२३ अन्वये या कलमाद्वारे संबंधित लोकांना मुंबई पोलिसांकडून चौकशीसाठी बोलावले आहे. सुरक्षेचा विषय असल्याने जिल्हाधिकारी एम. देवेंदर सिंह यांनी याची गंभीर दखल केली. या प्रकरणानंतर गायब असलेल्या ग्रामसेवकाला बोलवून त्याची चौकशी केली. तत्कालीन नोंदी तपासल्या. त्यामध्ये हा दाखला देण्यात आल्याची बाब पुढे आली आहे. कोरोना काळामध्ये मे २०२० ला हा जन्मदाखला देण्यात आल्याचे चौकशीत समजते, तसेच संबंधित ग्रामसेवकाचे रेकॉर्ड पाहता त्यांच्यावर यापूर्वीच कारवाई व्हायला हवी होती, असेही जिल्हाधिकाऱ्यांनी स्पष्ट केले. हे प्रकरण गंभीर असून, चौकशीनंतर संबंधितावर कडक कारवाई होईल, असे जिल्हाधिकारी सिंह यांनी सांगितले.

तत्कालीन सरपंचाला नोटीस
मुंबई पोलिसांनी तत्कालीन सरपंचाला २५ डिसेंबरला २०२४ नोटीस दिली असून, चौकशीसाठी हजर राहण्यास सांगितले आहे. मुंबईत एका गुन्ह्यात अटक करण्यात आलेल्या आरोपी शेख याला खोटा जन्म दाखला बनवून देण्यास सहकार्य केल्याबद्दल चौकशीला हजर राहावे, असे नोटिसीमध्ये नमूद केले आहे.