कुडाळात आज
‘गुणगुण गाणी’
कुडाळः नाद संगीत अॅकॅडमीतर्फे सिंधुदुर्ग येथे आयोजित आठवणींना उजाळा देणारा ‘गुणगुण गाणी’ हा नृत्याविष्कार कार्यक्रम उद्या (ता. १९) सायंकाळी ७ वाजता येथील मराठा समाज सभागृहात आयोजित करण्यात आला आहे. या कार्यक्रमाची संकल्पना अॅकॅडमीचे संचालक आदित्य आचरेकर, गोपाळ परब यांची असून कार्यक्रमाचे लेखक डॉ. राजेंद्र चव्हाण, दिग्दर्शक अभिषेक गवंडे आहेत. नृत्य मार्गदर्शन संकल्प क्रिएशन, कुडाळचे भूषण बाक्रे यांचे आहे. या कार्यक्रमाचा लाभ घेण्याचे आवाहन केले आहे.
...............
कुडाळ येथे आज
वर्धापन सोहळा
कुडाळः अयोध्येतील श्रीराम मंदिर स्थापना दिनाचे औचित्य साधून नूतनीकरण केलेल्या श्री देव रवळनाथ मंदिराचा प्रथम वर्धापनदिन सोहळा बुधवारी (ता. २२) विविध धार्मिक व सांस्कृतिक कार्यक्रमांनी साजरा करण्यात येणार आहे. यानिमित्त सकाळी ९ वाजता लघुरुद्र, दुपारी १ वाजता महाप्रसाद, ३ वाजता महापूजा, सायंकाळी ५ वाजता ग्रामस्थांची भजने, रात्री ८ वाजता श्री कलेश्वर दशावतार नाट्यमंडळ नेरुर (संचालक, भाईकलिंगण) यांचे ‘ट्रिकसिन’युक्त नाटक ‘मेहंदीपुरचा बालाजी’ अर्थात ‘सूडाग्नी’ सादर होणार आहे. सर्व नाट्यरसिक व भाविकांनी कार्यक्रमांचा लाभ घ्यावा.
...............
म्हापण ग्रामपंचायतीतर्फे
मोफत एक्स-रे तपासणी
म्हापणः राष्ट्रीय क्षयरोग दूरीकरण कार्यक्रमांतर्गत मोहिमेत आयुष्मान आरोग्य मंदिर, परुळे बाजार ग्रामपंचायत येथे मोफत एक्स-रे तपासणी कार्यक्रम झाला. यावेळी जोखीमग्रस्त गटातील लाभार्थ्यांची चेस्ट एक्स-रे तपासणी करण्यात आली. यावेळी जिल्हा रुग्णालयाचे अमित गंगावणे, जिल्हा क्षयरोग अधिकारी डॉ. गणेश जाधव, नितीन नाईक, सरपंच प्रणिती आंबडपालकर, उपसरपंच संजय दुधवडकर, पोलिसपाटील जनार्दन पेडणेकर, सदस्य प्रदीप प्रभू, प्राथमिक आरोग्य केंद्र, परुळेचे आरोग्य सहायक नागेश तोरसकर व सत्यवान मठकर, आरोग्य समुदाय अधिकारी वैष्णवी पाटकर, काजल परब, आरोग्यसेवक एस. आर. चव्हाण, मनोज दुधवडकर, आशा स्वयंसेविका कोमल मांजरेकर, रक्षित गोवेकर, राजलक्ष्मी परुळेकर, मदतनीस आरती परुळेकर आदी उपस्थित होते. या कार्यक्रमात ७० लाभार्थ्यांची एक्स-रे तपासणी करण्यात आली. यावेळी ‘क्षयमुक्त भारत’ची शपथ घेण्यात आली.
..............
तळेरे व्यापारी संघाचा
आज वर्धापन दिन
तळेरे : येथील आदर्श व्यापारी संघटनेचा ६८ वा वर्धापन दिन सोहळा उद्या (ता. १९) विविध कार्यक्रमांनी साजरा होणार आहे. यानिमित्त विविध कार्यक्रमांचे आयोजन केले आहे. सकाळी ८.३० वाजता ‘श्रीं’ची महापूजा, आरती, तीर्थप्रसाद, ११ वाजता श्री गांगेश्र्वर प्रासादिक भजन मंडळ तळेरे-गावठाणचे बुवा संतोष तळेकर यांचे भजन, दुपारी २ वाजता हळदी-कुंकू, ३.३० वाजता श्री हनुमान प्रासादिक भजन मंडळ, पाचल-राजापूरचे बुवा तेजस नारकर व विठ्ठल रखुमाई प्रासादिक भजन मंडळ, पुरळ-देवगडचे बुवा प्रवीण सुतार यांचा २०-२० भजनाचा सामना रंगणार आहे. सायंकाळी ५ वाजता यशस्वी उद्योजक, उत्कृष्ट कार्यकर्ता, उत्कृष्ट सामाजिक संस्था पुरस्कारांचे वितरण होईल. यावेळी सिंधुदुर्ग जिल्हा व्यापारी महासंघाचे अध्यक्ष प्रसाद पारकर, कार्यवाह नितीन वाळके, सहकार्यवाह चंद्रकांत जठार, कोषाध्यक्ष अरविंद नेवाळकर, तळेरे सरपंच हनुमंत तळेकर, उपसरपंच रिया चव्हाण उपस्थित राहणार आहेत. रात्री ८ वाजता वामनराव महाडिक विद्यालयाची ‘आये’ ही एकांकिका, त्यानंतर मालवणी नाटक ‘गावय’ सादर होईल. उपस्थित राहण्याचे आवाहन तळेरे व्यापारी संघटनेने केले आहे.
................