-ratchl१८४.jpg
२५N३९५५४
ः चिपळूण ः अपरांत संगिती विशेषांकाचे प्रकाशन करताना मान्यवर.
------
बौद्ध ओळख ‘धम्म’ स्वीकाराने
प्राप्त झाली ः प्रा. देवडेकर
महाडमध्ये तिसऱ्या सम्यक साहित्य संगितीचे उद्‍घाटन
सकाळ वृत्तसेवा
चिपळूण, ता. १८ ः सामाजिक सुधारणा करणे आणि सामाजिक पुनर्रचना करणे या दोन भिन्न बाबी आहेत. त्या समजून घेतल्या पाहिजेत. शेकडो वर्षापूर्वी छिन्नविच्छिन्न झालेली आमची मूळ बौद्ध ओळख (आयडेंटिटी) धम्म स्वीकाराने आम्हाला पुन्हा प्राप्त झाली आहे. आता आम्ही सोडलेल्या धर्मातील रूढी-परंपराच्या सुधारणांच्या फंदात न पडता नव्या धम्माला साजेशा सामाजिक पुनर्बांधणीतून ही बौद्ध आयडेंटिटी प्रस्थापित करण्याची भूमिका जबाबदारीने बजवायला हवी, असे प्रतिपादन तिसऱ्या सम्यक साहित्य कला संगितीचे अध्यक्ष प्रा. आनंद देवडेकर यांनी येथे केले .
अपरान्त साहित्य कला प्रबोधिनीच्यावतीने तिसरी सम्यक साहित्य कला संगिती महाड येथील गोपाळबाबा वलंकर साहित्यनगरी, भारतरत्न डॉ. बाबासाहेब आंबेडकर राष्ट्रीय स्मारक येथे दोन दिवस आयोजित केली आहे. त्याचे उद्‍घाटन लेखक व विचारवंत प्रेमानंद गज्वी यांच्या हस्ते झाले. या वेळी प्रबोधिनीचे अध्यक्ष साहित्यिक ज. वी. पवार, सरचिटणीस सुनील हेतकर, रत्नागिरीचे अध्यक्ष संजय गमरे आदी उपस्थित होते.
प्रा. देवडेकर म्हणाले, बौद्ध आयडेंटीचे संवर्धन करणारी सृजनशीलता कार्यरत झाली तर महाडच्या या ऐतिहासिक क्रांती भूमीत संपन्न झालेली ही सम्यक साहित्य कलासंगिती भावी पिढ्यांसाठीही प्रेरक ठरेल. या निमित्त तुळशीराम जाधव, दीपेश भाऊ जाधव, अरूणा येलवे यांचा विशेष सन्मान करण्यात आला.