swt1820.jpg
39593
वेर्लेः धरण प्रकल्पाचे भूमिपूजन आमदार दीपक केसरकर यांच्या हस्ते करण्यात आले. बाजूला सचिन वालावलकर, चंद्रकांत गावडे, अशोक दळवी, रामचंद्र धोत्रे व इतर.

वेर्ले धरणामुळे पर्यटनाला चालना
दीपक केसरकरः अॅडव्हेंचर स्पोर्टससाठी वापर होणार
सकाळ वृत्तसेवा
सावंतवाडी, ता. १८ः वेर्ले येथील धरणामुळे परिसरातील बागायतदारांना मोठा फायदा होणार आहे. शिवाय धरणाचा उपयोगपर्यटन दृष्ट्या अॅडव्हेंचर स्पोर्ट्ससाठी होईल. धरण प्रकल्प पूर्ण झाल्यानंतर अनेक पर्यटक या परिसरात येतील, असा विश्वास महाराष्ट्राचे माजी शिक्षणमंत्री आमदार दीपक केसरकर यांनी व्यक्त केला.
वेर्ले येथील मृद व जलसंधारण विभागाच्यावतीने वेर्ले येथे उभारण्यात येत असलेल्या धरण प्रकल्पाचे भूमिपूजन आज आमदार केसरकर यांच्या उपस्थितीत झाले. यावेळी जलसंधारण विभागाचे उपविभागीय अभियंता रामचंद्र धोत्रे, भूषण नार्वेकर, शाखा अभियंता सौरभ अहिर, आशुतोष यादव, जिल्हा नियोजन सदस्य सचिन वालावलकर, चंद्रकांत गावडे, शिंदे शिवसेनेचे जिल्हाप्रमुख अशोक दळवी, तालुकाध्यक्ष बबन राणे, कंत्राटदार प्रकाश पाटील, बाबासाहेब शिंदे, जिल्हा बँक संचालक रवींद्र मडगावकर, जीवन लाड, राजन रेडकर आदी उपस्थित होते.
आमदार केसरकर म्हणाले, "शिरशिंगे येथील बंद असलेला धरण प्रकल्प आता नव्याने सुरू होत आहे. या धरणाचा फायदा हा वेर्ले गावाला होणार आहे. हे गाव एका ठराविक उंचीवर आहे. त्यामुळे वेर्ले येथे मृद जलसंधारण विभागाच्या माध्यमातून हा धरण प्रकल्प उभा राहणार आहे. वेर्ले येथील हे धरण दहा कोटी रुपये खर्च करून मंजूर करण्यात आले आहे. हे धरण ३२५.०० मीटर उभारण्यात येणार असून त्यामध्ये ३०.४९ दशलक्ष घनफूट साठवण क्षमता आहे. या धरणाचे पाणलोट क्षेत्र ५.८० चौ.कि.मी. इतके आहे. धरणातून सिंचन क्षेत्र २४८ हेक्टर क्षेत्र ओलिताखाली येणार आहे."
ते पुढे म्हणाले, "वेर्ले येथील धरण प्रकल्पाचा फायदा पर्यटन वाढीसाठी होणार आहे. धरणाचा फायदा आंबोली परिसरातील अॅडव्हेचर स्पोर्ट्ससाठी होणार असून वेर्लेतील बागायतदारांना पाणी मिळणार आहे. त्यामुळे अधिकची जमीन ओलिताखाली येईल. येथील बागायतदारांना अनेक नवनवीन बाजारपेठा उपलब्ध होणार आहेत.’’ उपविभागीय अभियंता धोत्रे यांनी धरण प्रकल्पाबाबत माहिती दिली.