rat16p29.jpg
45596
रत्नागिरी : बसणी येथील जी. एम. शेट्ये हायस्कूलमध्ये आयोजित मार्गदर्शन कार्यक्रमावेळी बोलताना प्रसाद गवाणकर. सोबत मार्गदर्शक सत्यवान रेडकर.
-----------

शेट्ये हायस्कूलमध्ये
स्पर्धा परीक्षा मार्गदर्शन
रत्नागिरी, ता. १६ : बसणी येथील जी. एम्. शेट्ये हायस्कूलमध्ये स्पर्धा परीक्षा मार्गदर्शन सीमा शुल्क विभाग मुंबईचे कनिष्ठ अनुवाद अधिकारी सत्यवान रेडकर यांनी केले. त्यांनी स्पर्धा परीक्षेविषयी सखोल माहिती दिली. जवळपास तीन तासांत त्यांनी विद्यार्थी, परीक्षार्थी, शिक्षक, ग्रामस्थ व संस्था पदाधिकाऱ्यांना अभ्यासपूर्ण माहिती सांगितली.
युपीएससी, एमपीएससी, सरळ सेवा भरती, बँक रिक्रुटमेंट अशा विविध स्पर्धा परीक्षा विषयी माहिती देताना परीक्षेचे नाव, पात्रता, वयोमर्यादा व त्यासाठी आवश्यक असणारे कागदपत्रे अशी विस्तृत माहिती दिली. शिक्षक व संस्था पदाधिकारी यांनी हा कार्यक्रम म्हणजे रेडकर यांनी ज्ञानाची कवाडे आपल्याला उघडी करून दिली, असे मत प्रसाद उर्फ बापू गवाणकर यांनी व्यक्त केले.
विद्यार्थ्यांनीही बोलक्या प्रतिक्रिया व्यक्त केल्या. मंथन वायंगणकर याने अशा प्रकारच्या परीक्षा असतात याची माहिती आपल्यापर्यंत यापूर्वी व्यवस्थित पोहोचली नव्हती. परंतु आता मात्र आम्ही निश्चित प्रयत्न करू, असे सांगितले. शिक्षिका सायली मयेकर यांनी पुन्हा स्पर्धा परीक्षांकडे वळावे, अशी इच्छा बळावल्याचे सांगितले.
चारुशीला बाउसकर या स्पर्धा परीक्षेला सामोरे जाणाऱ्या विद्यार्थिनीने आजचे व्याख्यान खूपच माहितीपूर्ण होते. त्यामुळे स्पर्धा परीक्षांविषयी अधिक सजग होता आले. विद्यार्थ्यांनी आत्तापासूनच स्पर्धा परीक्षेची तयारी करावी व शिक्षकांच्या मदतीने ज्ञानार्जन करावे, असे सुचवले. पालकांनी विद्यार्थ्यांच्या अध्ययन प्रक्रियेमध्ये सहभागी व्हावे, असे मत व्यक्त केले. मुख्याध्यापक नाईक यांनी आजचे मार्गदर्शन बहुमोल होते. बऱ्याच परीक्षांची माहिती पहिल्यांदा सर्वांसाठी उघड झाली असल्याचे मत व्यक्त केले.