- rat18p5.jpg

अमर पांचाळ

पाटगावमधील तरुणाचा
मलकापूर येथे अपघाती मृत्यू
संगमेश्वर, ता. १८ ः देवरूखनजीकच्या पाटगाव-गवंडीवाडीतील तरुणाचा कोल्हापूर जिल्ह्यातील मलकापूर येथे अपघाती मृत्यू झाल्याची दुर्दैवी घटना शनिवारी सायंकाळी घडली. अमर अशोक पांचाळ (वय २२) असे मृत तरुणाचे नाव आहे.
याबाबत अधिक माहिती अशी; अमर पांचाळ याचे मूळ गाव संगमेश्वर तालुक्यातील नांदळज असून कामानिमित्त पांचाळ कुटुंबीय गेली अनेक वर्षे पाटगाव-गवंडीवाडी येथे वास्तव्यास आहे. शनिवारी अमर पांचाळ व रोशन लिंगायत हे कामानिमित्त मोटारसायकलने मलकापूर येथे गेले होते. काम आटोपल्यानंतर दोघेही परत येत असताना त्यांच्या दुचाकीचा अपघात झाला. यामध्ये अमरच्या डोक्याला गंभीर दुखापत झाल्याने त्याचा जागीच मृत्यू झाला; तर त्याच्यासोबतच्या रोशन याच्या पायाला दुखापत झाली आहे. त्याच्यावर रुग्णालयात उपचार सुरू आहेत. अमरच्या अपघाती मृत्यूची बातमी पाटगाव व नांदळजमध्ये समजताच हळहळ व्यक्त करण्यात आली. त्याचा मृतदेह रविवारी सकाळी पाटगाव येथे आणण्यात आल्यावर शोकाकूल वातावरणात त्याच्यावर अंत्यसंस्कार करण्यात आले. अमरच्या पश्चात आई, वडील, भाऊ, बहीण असा परिवार आहे.