शेकोटी घेताना वृद्धा भाजली
रत्नागिरी ः येगांव (ता. चिपळूण) येथे परिसरातील कचरा गोळा करून जाळत असताना वृद्ध महिला ६० टक्के भाजली. तिला उपचारासाठी जिल्हा शासकीय रुग्णालयात दाखल केले आहे. प्रगती पर्शुराम महाडिक (वय ६०, रा. येगांव, चिपळूण) असे तिचे नाव आहे. ही घटना सोमवारी (ता. १७) सकाळी नऊच्या सुमारास येगांव येथे घडली. प्रगती महाडिक या घरी असताना त्यांनी घराच्या परिसरातील पालापाचोळा गोळा करून तो जाळला. तेथे शेकोटी घेत असताना त्यांच्या गाऊनने पेट घेतला. त्यामध्ये त्या ६० टक्के भाजल्या. त्यांच्या मुलीने उपचारासाठी खासगी रुग्णालयात नंतर प्राथमिक आरोग्यकेंद्र कामथे येथे दाखल केले होते. अधिक उपचारासाठी मंगळवारी (ता. १८) जिल्हा शासकीय रुग्णालयात दाखल केले आहे.
-------
वाहतुकीस अडथळा
करणाऱ्या चालकांवर गुन्हा
रत्नागिरी ः मुंबई-गोवा महामार्गावर तालुक्यातील लांजा येथील एका हॉटेलच्या समोर रहदारीस अडथळा होईल, अशी वाहने पार्क करणाऱ्या दोन चालकांविरुद्ध लांजा पोलिस ठाण्यात गुन्हा दाखल करण्यात आला आहे. हसमुद्दीन सुभानअल्ली (वय ३२, रा. खैराही, उत्तर प्रदेश) व सद्दाम हुसेन मोहम्मद हदीस (३३, रा. पाली) अशी त्यांची नावे आहेत. ही घटना सोमवारी (ता. १७) सायंकाळी सव्वासहाच्या सुमारास लांजा येथील कोकण किनारा हॉटेलसमोर रस्त्यावर निदर्शनास आली. संशयित चालकांनी डंपर (एमएच ०५, इएल १५८१) व डंपर (एमएच ०५, इएल १५८०) या सार्वजनिक ठिकाणी रहदारीस व वाहनांना धोका होईल, अशा स्थितीत पार्क केले होते. याप्रकरणी पोलिस हेडकॉन्स्टेबल रहीम हसन मुजावर यांनी लांजा पोलिस ठाण्यात तक्रार दिली.