46280

मालवणात घुमला शिवरायांचा जयघोष

पदयात्रेला प्रतिसाद; पंतप्रधान मोदींच्या हस्ते ऑनलाईन उद्‍घाटन

सकाळ वृत्तसेवा
मालवण, ता. १९ ः छत्रपती शिवाजी महाराजांच्या जयंतीनिमित्त आज सकाळी शहरात ‘जय शिवाजी, जय भारत’, भव्य पदयात्रा काढण्यात आली. पदयात्रेच्या निमित्ताने ‘जय शिवाजी, जय भवानी’ अशा जोरदार घोषणा देण्यात आल्या. यामुळे संपूर्ण शहर शिवमय बनल्याचे दिसून आले.
सकाळी आठ वाजता पंतप्रधान नरेंद्र मोदी यांच्या हस्ते आभासी पद्धतीने या पदयात्रेचे उद्‍घाटन करण्यात आले. टोपीवाला हायस्कूल येथून ढोल ताशांच्या गजरात या पदयात्रेस सुरुवात झाली. यात माजी पालकमंत्री, आमदार दीपक केसरकर, जिल्हाधिकारी अनिल पाटील, प्रांताधिकारी ऐश्वर्या काळुसे, तहसीलदार वर्षा झालटे, सार्वजनिक बांधकाम विभागाचे अधिकारी, अन्य शासकीय अधिकारी, टोपीवाला हायस्कूल, भंडारी हायस्कूल, रोझरी इंग्लिश स्कूल, जयगणेश इंग्लिश मीडियम स्कूलसह सिंधुदुर्ग महाविद्यालयाचे एनसीसीचे विद्यार्थी, शिवप्रेमी, पोलिस अधिकारी, कर्मचारी मोठ्या संख्येने सहभागी झाले होते. टोपीवाला हायस्कूल ते फोवकांडा पिंपळ मार्गे, मेकॅनिकल रोड, भरड बाजारपेठ मार्गे मेढा ते राजकोट किल्ला अशी पदयात्रा काढण्यात आली. यावेळी छत्रपती शिवाजी महाराजांचा जयजयकार करण्यात आला. पदयात्रेत घोडे, चित्ररथांनी लक्ष वेधले. रस्त्याच्या दुतर्फा दोन्ही बाजूने भगवे झेंडे संपूर्ण मार्गावर लावले होते. त्यामुळे संपूर्ण मालवण शहर शिवमय झाल्याचे दिसून आले. या पदयात्रेत सहभागी झालेल्या आमदार दीपक केसरकर यांनी ऐतिहासिक वेशभूषा परिधान केलेल्या कलाकारांचे कौतुक करत सर्वांना शुभेच्छा दिल्या. राजकोट किल्ला येथे या पदयात्रेची सांगता झाली.