भंगार व्यावसायिकाचे
अनधिकृत वाहन ताब्यात

मालवण, ता. २५ : तालुक्यातील भंगार व्यवसायिकांकडे अनधिकृत गाड्या वापरात असल्याची माहिती मिळाल्यानंतर आमदार नीलेश राणे यांच्या सूचनेनुसार जिल्ह्याचे परिवहन अधिकारी नंदकिशोर काळे यांच्या नेतृत्वाखालील पथकाने जाऊन तपासणी केली. यात एका कंपनीचे वाहन अनधिकृतपणे वापरात असल्याचे निदर्शनास आल्याने ते ताब्यात घेतले. जिल्हा परिवहन अधिकारी श्री. काळे यांनी ही माहिती दिली.
श्री. काळे यांनी दिलेल्या माहितीनुसार, ही गाडी मालवण पोलिस ठाण्यात जमा केली असून यानंतरच्या काळातही भंगार विक्रेत्यांकडे जिल्ह्यात अनधिकृतपणे वापरात असलेल्या गाड्यांची तपासणी करून त्या ताब्यात घेतल्या जाणार आहेत. आज आमदार राणेंच्या सूचनेनुसार जिल्हा परिवहन अधिकारी नंदकिशोर काळे यांच्या नेतृत्वाखालील पथकाने मालवणात भंगार विक्रेत्यांच्या वाहनांची तपासणी केली. यावेळी एम. एच. ०७ एजे- ३५८९ ही गाडी अनधिकृतरित्या वापरात असल्याचे निदर्शनास आले. ती परिवहन विभागामार्फत ताब्यात घेऊन पोलिसांकडे सुपूर्द केली. याठिकाणी आज अन्य दुचाकी वाहने आढळली नाहीत. मात्र, तपासणी मोहीम हाती घेण्यात येणार असल्याचे श्री. काळे यांनी सांगितले. या पथकात मोटर वाहन निरीक्षक संदीप भोसले, केतन पाटील, प्रीतम पवार आदी अधिकारी सहभागी झाले होते.