मसुरेत शनिवारी
कबड्डी स्पर्धा
मसुरे : नवतरुण मित्रमंडळ डांगमोडे यांच्यातर्फे आयोजित आणि सिंधुदुर्ग कबड्डी फेडरेशनच्या मान्यतेने पुरुष व महिला कबड्डी स्पर्धेचे आयोजन शनिवारी (ता. ८) सायंकाळी ६ वाजता मसुरे डांगमोडे रवळनाथ मंदिर येथे श्री भवानी मातेच्या वार्षिक गोंधळ उत्सवानिमित्त केले आहे. विजेत्या पुरुष संघाला अनुक्रमे ७००० रुपये व चषक, उपविजेत्या संघास ५००० रुपये व चषक, तसेच महिला गटासाठी प्रथम ७००० व चषक, द्वितीय ५००० व चषक देण्यात येईल. तसेच दोन्ही गटातील उत्कृष्ट चढाई, उत्कृष्ट पकड व अष्टपैलू खेळाडूंना प्रत्येकी ५०० रुपये व चषक देऊन गौरविण्यात येणार आहे. स्पर्धेतील सर्व चषक (कै.) शिवाजी गंगाराम ठाकूर यांच्या स्मरणार्थ पुरस्कृत केले आहेत. खेळाडू व हितचिंतकांची भोजन व्यवस्था करण्यात आली आहे. स्पर्धा सायंकाळी सहा वाजता सुरू होईल. स्पर्धेचे उद्‌घाटन माजी केंद्रीय मंत्री नारायण राणे यांच्या हस्ते होणार असून, यावेळी आमदार नीलेश राणे, शिवसेना जिल्हाप्रमुख दत्ता सामंत, शिवसेना नेते संजय आंग्रे आदी उपस्थित राहणार आहेत. कबड्डी स्पर्धेसाठी नितीन हडकर व दत्तप्रसाद पेडणेकर यांच्याशी संपर्क साधावा, असे आवाहन केले आहे.
.................
देवगड तालुक्यामध्ये
किनारी भागात उकाडा
देवगड ः तालुक्याच्या किनारी भागातील वातावरणामधील उकाडा वाढला आहे. अधूनमधून आकाशात काळे ढग जमा होत असतात. रात्रीच्यावेळी प्रकाशाकडे पाखरे (लहान कीटक) जमा होत असल्याने पावसाची लक्षणे मानली जात आहेत. दरम्यान, अचानक उकाडा वाढल्याने आंबा, काजू पिकांसाठी वातावरण परिणामकारक ठरू शकते, असे मत नोंदवले जात आहे. गेले काही दिवस वातावरणातील उष्णतेत वाढ झाली आहे. रात्रीच्यावेळी दवाचे प्रमाण असते. अधूनमधून आकाशात काळे ढग जमा होत असतात. दिवसा उन्हाचा पारा चढलेला असतो. पावसाळ्याप्रमाणे सध्या सायंकाळच्यावेळी दिव्यावर पाखरे येतात. त्यामुळे वळवाचा पाऊस कोसळण्याची लक्षणे मानली जात होती. तसे झाल्यास आंबा, काजू पिकासाठी धोकादायक ठरू शकते, असे बागायतदारांचे म्हणणे आहे.