50232

पाणीपुरवठा विभागाविरोधात
उद्या वेताळ बांबर्डेत उपोषण

सकाळ वृत्तसेवा
कुडाळ, ता. ९ ः जिल्हा परिषद ग्रामीण पाणीपुरवठा विभागाचा भोंगळ व बेजबाबदार कारभाराचा निषेध म्हणून वेताळ बांबर्डे ग्रामस्थ मंगळवारी (ता. ११) उपोषण आंदोलन करणार असल्याची माहिती ग्रामस्थ प्रसाद गावडे यांनी दिली.
वेताळ बांबर्डे गावातील जलजीवन मिशनच्या अंतर्गत पाण्याच्या योजनांसाठी ठेकेदारास कार्यारंभ आदेश देऊन दोन वर्षे कालावधी उलटून गेला तरी ठेकेदाराकडून चारही योजनांच्या कामांना सुरुवात केली नसल्याने गावात योजनेची अंमलबजावणी होऊ शकली नाही. गावात जलजीवन मिशनअंतर्गत चार योजना मंजूर असून त्यासाठी २ कोटी ६८ लाख रुपयांच्या कामांना दोन वर्षांपूर्वी कार्यारंभ आदेश देण्यात आला होता; मात्र ठेकेदार व अधिकारी यांच्या अनास्थेमुळे गावात आजपर्यंत एकही काम झाले नाही. ‘घराघरांत नळ’ ही केंद्राची योजना वेताळ बांबर्डे गावात राबविली गेली नसून पाणी पुरवठा विभागाने ग्रामस्थांवर मोठा अन्याय केला आहे. ग्रामीण पाणीपुरवठा विभागाच्या अधिकाऱ्यांचे ठेकेदाराशी साटेलोटे असल्याने त्यांनीही दोन वर्षांत बघ्याचीच भूमिका घेतल्याचा आरोप प्रसाद गावडेंनी करत ग्रामीण पाणीपुरवठा विभागाचे कार्यकारी अभियंता व उपअभियंता कुडाळ यांच्या भोंगळ कारभारा विरोधात वेताळ बांबर्डे ग्रामपंचायत कार्यालयासमोर उपोषण आंदोलन छेडणार करणार असल्याचे पत्र त्यांनी कार्यकारी अभियंत्यांना दिले आहे.