50392

लक्ष्मीपूजनादिवशी विराजमान
श्री गणरायाचे थाटात विसर्जन

उभादांडा मंदिरातील आगळीवेगळी परंपरा

सकाळ वृत्तसेवा
वेंगुर्ले, ता. १० ः दीपावली लक्ष्मीपूजनादिवशी विराजमान झालेल्या उभादांडा येथील श्री गणेश मंदिरातील गणपतीचे होळी पौर्णिमेअगोदर रविवारी (ता. ९) रात्री तब्बल साडेचार महिन्यांनी ढोलताशांच्या गजरात, भजनाच्या साथीने भाविकांच्या उपस्थितीत सागरेश्वर समुद्रात विसर्जन करण्यात आले.
उभादांडा येथील हे गणेश मंदिर शंभर वर्षांहून अधिक जुने आहे. येथे आगळीवेगळी प्रथा आहे. मंदिरात केवळ साडेचार महिने गणपतीची मूर्ती बसविली जाते. अन्य दिवशी येथे गणपतीच्या प्रतिमेचे पूजन केले जाते. प्रतिवर्षी दीपावली लक्ष्मीपूजनादिवशी गणपती विराजमान होतो आणि त्यानंतर होळी पौर्णिमेच्या अगोदर त्याचे विसर्जन होते. मंदिरात दररोज भजने, नाटक, वार्षिक जत्रा अशा विविध धार्मिक कार्यक्रमांची रेलचेल असते. रविवारी रात्री भजन, आरतीनंतर भक्तिमय वातावरणात सागरेश्वर किनारी गणपतीचे विसर्जन करण्यात आले.