‘शेतकऱ्यांनो, तातडीने फार्मर आयडी काढा’

सकाळ वृत्तसेवा
सिंधुदुर्गनगरी, ता. ११ ः कृषी क्षेत्रात डिजिटल सेवांचा वापर करून शेतकऱ्यांना जलदगतीने सेवा देण्यासाठी ‘ॲग्रीस्टॅक’ म्हणजेच शेतकरी ओळखपत्र क्रमांक देण्याची प्रक्रिया सुरू आहे. यात १२ ते १६ मार्च दरम्यान जिल्ह्यातील सर्व तालुक्यातील सर्व गावांत फार्मर आयडी तयार करण्यासाठी सीएससी केंद्रामार्फत विशेष शिबिर आयोजित केले आहे. सर्व शेतकऱ्यांनी त्यांचे फार्मर आयडी काढावे, असे आवाहन जिल्हा अधिक्षक कृषी अधिकारी भाग्यश्री नाईकनवरे यांनी केले आहे.
शेतकऱ्यांच्या नावावर शेतजमीन असेल तर त्यांचा फार्मर आयडी, अर्थात शेतकरी ओळख क्रमांक दिला जाणार आहे. त्यामुळे शेतकऱ्यांना कृषी विषयक सेवा, सुविधा तसेच शासकीय योजनांचे लाभ पारदर्शकपणे मिळू शकतील. यासाठी ‘ॲग्रीस्टॅक’ नावाने डिजिटल प्लॅटफॉर्म तयार केला आहे. याची नोंदणी प्रत्येक महा-ई-सेवा केंद्रावर सुरू असून ‘ॲग्रीस्टॅक’ उपक्रमाची गावस्तरावर मोहीम राबवून शेतकऱ्यांचा फार्मर आयडी तयार होण्यासाठी हा उपक्रम प्रशासनाकडून प्राधान्याने हाती घेतला आहे. या योजनेतून थेट सरकारी अनुदान व मदत, पीएम किसान सन्मान निधी दरवर्षी थेट बँक खात्यात जमा होण्यास मदत होईल. तसेच पिक विमा, पीक कर्ज मंजुरी, कृषी अनुदान, खत व बियाणे योजनाचा जलद लाभ मिळणार आहे. यासोबतच हवामान अंदाज, आधुनिक शेती सल्ला आणि बाजारभाव माहिती, मृद्रा परीक्षण व जलद सल्ला, राज्य आणि केंद्राच्या सर्व कृषी योजनांमध्ये प्राधान्य, नवीन कृषी तंत्रज्ञान, अवजारे आणि सिंचन योजना, शेततळे, ठिबक सिंचन, गटशेती योजनेतील लाभ, गट नोंदणी व शेतकऱ्यांसाठी विशेष सवलतीसाठी हे महत्त्वाचे ठरणार आहे.