अनंत मुस्कान कार्यक्रमांतर्गत
रंगली ‘सहविकसन कार्यशाळा’

सिंधुदुर्गनगरी, ता. १२ ः हेलिस सेखसरिया इन्स्टिट्यूट ऑफ पब्लिक हेल्थ, नवी मुंबईच्यावतीने अनंत मुस्कान कार्यक्रमाच्या अंमलबजावणीसाठी ‘सहविकसन कार्यशाळा’ जिल्हा परिषदेच्या छत्रपती शिवाजी महाराज सभागृहात येथे झाली. जिल्हा आरोग्य अधिकारी डॉ. सई धुरी यांनी ही माहिती दिली.
‘अनंत मुस्कान’ कार्यक्रमाद्वारे भारतातील प्राथमिक शाळांमध्ये ब्रशने दात घासणे आणि तोंडाचे आरोग्य शिक्षण याबद्दल विविध राज्यांतील काही जिल्ह्यांमध्ये अंमलबजावणी केली जात आहे. प्रभावी अंमलबजावणीसाठी आरोग्य व शिक्षण क्षेत्रातील प्रतिनिधींची उपस्थिती कार्यशाळेस लाभली होती. या कार्यशाळेसाठी राज्याचे आरोग्य विभागाचे उपसंचालक (मौखिक) डॉ. उमेश शिरोडकर उपस्थित होते. कार्यक्रमाचे सहअध्यक्ष जिल्हा शल्य चिकित्सक डॉ. श्रीपाद पाटील, जिल्हा आरोग्य अधिकारी डॉ. सई धुरी, अतिरिक्त जिल्हा शिक्षण अधिकारी रामचंद्र अंगणे, अतिरिक्त जिल्हा आरोग्य अधिकारी डॉ. संदेश कांबळे, संचालक (हेलिस) डॉ. मंगेश पेडणेकर आणि डॉ. खुशबू शर्मा (कार्यक्रम प्रमुख, अनंत मुस्कान), प्रकल्प संशोधन शास्त्रज्ञ श्रीमती अक्षता गोजे, डॉ. संजिनवी शेटे यांची उपस्थिती होती. या कार्यशाळेमध्ये तालुका आरोग्य अधिकारी, दंत शल्य विशारद, क्लस्टर अधिकारी, समन्वयक, १० समुदाय आरोग्य अधिकारी तसेच कुडाळ आणि वेंगुर्ला तालुक्यातील २० शिक्षक व मुख्याध्यापक व हेलिस टिम सहभागी झाली.