बांगलादेशी नागरिकास
खेडमधून घेतले ताब्यात
खेड, ता. १२ ः तालुक्यातील कळंबणी आपेडे फाटा हॉटेल स्वामी लीलाजवळील साईटवर काम करताना आढळलेल्या एका बांगलादेशी नागरिकाला येथील पोलिसांनी ताब्यात घेतले आहे. ही कारवाई ११ मार्चला दुपारी १२.३५ च्या सुमारास करण्यात आली. अकबर अबू शेख असे या बांगलादेशी नागरिकाचे नाव आहे.
खेड पोलिसांकडून मिळालेल्या माहितीनुसार, अकबर अबू शेख (सध्या रा. कळंबनी, आपेडे फाटा, हॉटेल स्वामी लीलाजवळील साईटवर, ता. खेड, जि. रत्नागिरी, मूळ गाव पेडोली, तहसील चौदलपूर, ठाणा अभयनगर, जिल्हा जेशूर, राज्य ढाका, देश बांगलादेश) हा बांगलादेशातील गरिबीस व उपासमारीस कंटाळून उदरनिर्वाहाकरिता भारताच्या सरहद्दीवरील गस्ती पथकाची नजर चुकवून आला व मुलकी अधिकाऱ्याच्या परवानगीशिवाय भारतात अवैध प्रवेश करून कळंबणी हद्दीतील आपेडे फाटा, हॉटेल स्वामी लीलाजवळील साईटवर काम करताना आढळला. याची फिर्याद दहशतवादविरोधी शाखा रत्नागिरीचे पोलिस हवालदार आशिष शेलार यांनी येथील पोलिस ठाण्यात दिली. खेड पोलिसांनी अकबर अबू शेख याच्याविरोधात गुन्हा दाखल केला आहे.