वायरी वराडकरवाडीतील
चोरीप्रकरणी दोघे अटकेत

सकाळ वृत्तसेवा
मालवण, ता. १८ : वायरी वराडकरवाडी येथील भूषण साटम यांच्या घरी चोरी केल्याप्रकरणी येथील पोलिसांनी अखेर तिघा संशयितांविरोधात गुन्हा दाखल केला. याप्रकरणी सुमित केशव हांडे (रा. बाजारपेठ, मालवण) व सर्वेश सुनील बागवे (रा. धुरीवाडा, मालवण) या दोघांना अटक केली. त्यांना उद्या (ता. १९) न्यायालयात हजर करण्यात येणार आहे.
यातील तिसरा संशयित असलेला प्रसाद (पूर्ण नाव माहिती नाही, रा. कुंभारमाठ) हा पसार झाला आहे. साटम यांनी पोलिसांत दिलेल्या फिर्यादीत म्हटले आहे की, रविवारी रात्री १०.४० ते १२.१५ या वेळेत वायरी वराडकरवाडी येथील राहत्या घरात खिडकीद्वारे संशयित तिघा युवकांनी प्रवेश करून घरातील लॅपटॉप, चार्जर, माऊससह, सॅक, गॉगल असे सुमारे ४० हजार २०० रुपयांचे साहित्य चोरले. तसेच लेडीज पर्समधील रोख २० हजार रुपये पळविले. या फिर्यादीनंतर पोलिसांनी चोरीचा गुन्हा दाखल केला. अधिक तपास पोलिस निरीक्षक प्रवीण कोल्हे यांच्या मार्गदर्शनाखाली पोलिस हवालदार चांदोसकर हे करीत आहेत. तिसऱ्या संशयिताचा शोध सुरू असून लवकरच त्यालाही ताब्यात घेणार असल्याचे पोलिसांनी सांगितले.