बेकायदेशीर रस्त्याच्या कामाला
स्थगिती न दिल्यास आंदोलन

योगेश तांडेल ः पालकमंत्र्यांना दिले निवेदन

सकाळ वृत्तसेवा
सिंधुदुर्गनगरी, ता. १९ ः पालकमंत्री नीतेश राणे यांचे जनता दरबारातील आदेश धुडकावून जिल्हाधिकारी यांच्या नावे केलेल्या संमतीपत्रांसह बोगस कागदपत्रांच्या आधारे केल्या जाणाऱ्या रस्त्याच्या कामाला २४ मार्चपर्यंत स्थगिती न मिळाल्यास जिल्हाधिकारी कार्यालयासमोर बेमुदत उपोषण छेडू, असा इशारा सामाजिक कार्यकर्ते योगेश तांडेल यांनी दिला आहे.
याबाबत पालकमंत्री राणे यांच्यासह जिल्हाधिकारी यांना तांडेल यांनी निवेदन सादर केले. त्यात म्हटले आहे की, वेंगुर्ले तालुक्यातील वायंगणी ग्रामपंचायतीच्या कार्यक्षेत्रातील खानोली कोंडुरा ते येरम लिंगाचे देवालय या नियमबाह्य व बेकायदेशीर रस्त्याबाबत पाच-सहा वर्षांपासून आपण प्रशासनाचे लक्ष वेधून घेत आहे. या बेकायदेशीर रस्त्याच्या कामाबाबत कोणतीही कायदेशीर कारवाई होत नसल्याने २६ जानेवारीला जिल्हाधिकारी कार्यालयासमोर बेमुदत उपोषण छेडण्याचा इशारा पालकमंत्री व जिल्हाधिकाऱ्यांना दिला होता. त्या अनुषंगाने पालकमंत्री राणे यांनी ओरोस येथे २५ जानेवारीला घेतलेल्या जनता दरबारामध्ये महसूल उपविभागीय अधिकारी सावंतवाडी यांना चौकशीचे आदेश दिले होते. त्या अनुषंगाने २१ फेब्रुवारीला सकाळी ११ वाजता वेंगुर्ले तहसीलदार कार्यालय येथे बैठकीचे आयोजन केले होते; मात्र नियोजित बैठकीबाबत बांधकाम विभागाकडून २० फेब्रुवारीला सायंकाळी व्हॉट्सअॅपवर पत्र पाठवण्यात आले. परंतु मी तालुका औद्योगिक ग्रामोद्योग सहकारी संस्थेचा चेअरमन असल्याने व २१ फेब्रुवारीला संस्थेची पहिलीच नियोजित सभा त्याच दिवशी सकाळी ११ वाजता असल्यामुळे तहसीलदार कार्यालय येथे २१ फेब्रुवारीला घेण्यात आलेल्या बैठकीला उपस्थित राहू शकलो नाही, असे जिल्हाधिकाऱ्यांना दिलेल्या निवेदनात म्हटले आहे.