देवगड येथे लोकअदालतीत
१८,९२,२४२ रुपयांची वसुली
सकाळ वृत्तसेवा
देवगड, ता. २५ : देवगड तालुका विधी सेवा समिती व तालुका बार असोसिएशन यांच्यावतीने येथील दिवाणी न्यायालय ‘क’ स्तर येथे आयोजित राष्ट्रीय लोकअदालतीत दिवाणी व फौजदारी खटले तसेच वादपूर्व प्रकरणे अशा सुमारे ७२३ पैकी एकूण ३२ प्रकरणे निकाली काढण्यात आली. यातून सुमारे १८ लाख ९२ हजार २४२ रुपये इतकी वसुली झाली.
उच्च न्यायालय मुंबई, राज्य विधी सेवा प्राधिकरण मुंबई व जिल्हा विधी सेवा प्राधिकरण ओरोस (सिंधुदुर्ग) यांनी दिलेल्या निर्देशास अनुसरून येथील दिवाणी न्यायालय ‘क’ स्तर येथे राष्ट्रीय लोकअदालतीचे आयोजन करण्यात आले. याचे उद्‌घाटन दिवाणी न्यायाधीश तथा देवगड तालुका विधी सेवा समितीचे अध्यक्ष यांच्या हस्ते झाले. चालू वर्षातील ही पहिली राष्ट्रीय लोकअदालत होती.
या राष्ट्रीय लोकअदालतीत दिवाणी व फौजदारी खटले तसेच वादपूर्व प्रकरणे अशा ७२३ पैकी एकूण ३२ प्रकरणे निकाली काढण्यात आली. यातून सुमारे १८ लाख ९२ हजार २४२ रुपये इतकी वसुली झाली. या लोकअदालतीत दिवाणी व फौजदारीकडील एकूण ४८ प्रकरणे ठेवण्यात आली होती. त्यातील २३ प्रकरणे निकाली काढण्यात आली. त्यातून सुमारे १७ लाख १७ हजार ६०० रुपये इतकी वसुली झाली. बँक, महावितरण यातील सुमारे ६५७ वादपूर्व प्रकरणे ठेवण्यात आली होती. त्यातील ९ प्रकरणे निकाली काढण्यात आली. यातून एकूण १ लाख ७४ हजार ६४२ रुपये इतकी वसुली झाली. पॅनेल सदस्य म्हणून ॲड. आशिष लोके यांनी काम पाहिले.