रमजान ईदमुळे चिपळूण बाजारपेठेत तेजी
दुधासह सुका मेवा महाग; शिरखुर्मा, शेवयांसाठीच्या पदार्थांची खरेदी सुरू
चिपळूण, ता. २८ : रमजान ईदच्या निमित्ताने मुस्लिम बांधवांच्या घरी खास बनवण्यात येणाऱ्या शिरखुर्म्याच्या तयारीला वेग आला आहे. रमजान ईद दोन दिवसांवर आल्याने बाजारपेठांमध्ये शिरखुर्मा आणि शेवयांसाठी आवश्‍यक पदार्थांची जोरदार खरेदी सुरू आहे. किराणा दुकाने, सुका मेवा विक्रेत्यांकडे ग्राहकांची गर्दी दिसून येत आहे. दूध आणि सुका मेव्याचे दर किंचित वाढले असले तरी ईदच्या आनंदात त्याचा विशेष फरक जाणवत नाही. त्यामुळे चिपळूण बाजारपेठेत ग्राहकांची गर्दी वाढू लागली आहे.
रमजान ईदचा खास मेन्यू म्हणजे शिरखुर्मा आणि शेवई. हे दोन गोड पदार्थ ईददिवशी प्रत्येक मुस्लिम कुटुंबाच्या घरी बनवले जातात. कुटुंब किती मोठे, ईदच्या दिवशी किती पाहुणे घरी येणार आहेत आणि कितीजणांच्या घरी शिरखुर्मा पाठवायचा आहे, यावरून शिरखुर्म्यासाठी किती साहित्य आणायचे, हे ठरवले जाते. बदाम, काजू, पिस्ता, खोबरे, खसखस, शेवया, खजूर, अंजीर, जर्दाळू, चारोळी असा सुकामेवा शिरखुर्म्यासाठी वापरण्यात येतो. अनेक घरांत आता या गोष्टींची खरेदी झाली असून, खोबरे किसून ठेवणे, बदाम, अंजीर आणि इतर सुकामेव्याचे तुकडे करून तळून ठेवणे, खजुरातील बिया काढणे अशा तयारीची लगबग घराघरांत सुरू झाली आहे. कपडे, दागिने, भेटवस्तू आदींच्या खरेदीसाठी मुस्लिम बांधव आणि महिला येथील बाजारपेठेत सायंकाळी गर्दी करत आहेत. त्यामुळे व्यापारीही सुखावले आहेत.