अंगणवाडीस्तरीय उत्कृष्ट पुरस्कार जाहीर

उत्कृष्ट कामाची दखल ः जिल्ह्यातील २६ कर्मचाऱ्यांची निवड

सकाळ वृत्तसेवा
सिंधुदुर्गनगरी, ता. ३० ः जिल्हा परिषदेच्या महिला व बाल विकास विभागाअंतर्गत कार्यरत असलेल्या अंगणवाडी पर्यवेक्षिका, अंगणवाडी सेविका, मिनी अंगणवाडी सेविका व अंगणवाडी मदतनिस यांनी अंगणवाडीस्तरावर उत्कृष्ट काम केल्याबद्दल त्यांना २०२४-२५ चा जिल्हा परिषदेच्या आदर्श पुरस्कारांची घोषणा प्रशासक तथा मुख्या कार्यकारी अधिकारी रवींद्र खेबुडकर यांनी केली आहे.
जिल्हा परिषदेच्या महिला व बाल विकास विभागाअंतर्गत ८ प्रकल्प कार्यरत असून या प्रकल्पात कार्यरत असलेल्या पर्यवेक्षिका, अंगणवाडी सेविका, मिनी अंगणवाडी सेविका व अंगणवाडी मदतनिस यांना प्रतिवर्षी अंगणवाडी स्तरावर केलेल्या उत्कृष्ट कामासाठी पुरस्कार व सन्मानचिन्ह देऊन सन्मानित करण्यात येते. यामध्ये जिल्ह्यामधून २ पर्यवेक्षिका व प्रत्येक प्रकल्पातून एक अंगणवाडी सेविका, १ मिनी सेविका व १ मदतनिस मिळून एकूण २६ कर्मचाऱ्यांची जिल्हास्तरीय आदर्श पुरस्कारासाठी निवड करण्यात येते. यासाठी प्रकल्पस्तरावर गुणांकनाद्वारे आदर्श कर्मचाऱ्यांची निवड केली जाते. २०२४-२५ या वित्तीय वर्षामध्ये प्रकल्प स्तरावर १ मिळून एकूण ८ अंगणवाडी सेविका, ८ अंगणवाडी मिनी सेविका, ८ अंगणवाडी मदतनिस व जिल्हयातून २ पर्यवेक्षिका मिळून एकूण २६ कर्मचाऱ्यांची निवड करण्यात आली. निवड करताना २०२३-२४ या वित्तिय वर्षात केलेल्या कामाचे मूल्यमापन करण्यात आलेले आहे. यावेळी मुख्य कार्यकारी अधिकारी खेबुडकर, उपमुख्य कार्यकारी अधिकारी (बा.क.), जिल्हा कार्यक्रम अधिकारी (मबावि) सोमनाथ रसाळ उपस्थित होते.

तालुकानिहाय पुरस्कार विजेते असे ः देवगड- आरती कामतेकर (मिठबांव कोटकामते), पूजा रानडे (पडेल क्र. १), मीनाक्षी मांडवकर (मोंड रहाटेश्वर). वैभववाडी-शायरा रमदूल (उंबर्डे मेहबुबनगर), राजश्री जांभळे (वैभववाडी क्र.२, करुळ भोयाडेवाडी). अनिता कुडाळकर (वैभववाडी क्र.१, कोकिसरे विद्यामंदिर), कणकवली-प्रमिला फोपे (नांदगाव, कोंडये गावठण), सीताबाई शिंदे (कळसुली, बोर्डवे ग्रामपंचायत), वनिता पेडणेकर (नांदगाव, कोंडये गावठण). मालवण-स्नेहलता शिरवंडेकर (चौके क्र.१, नांदोस लक्ष्मीनारायण), आर्या मेस्त्री (आचरा क्र.२, मठबुद्रुक लिंग्रसवाडी), नूतन श्रावणकर (आचरा १, श्रावण परबवाडी), कुडाळ-अलका पाटकर (वालावल पाट), संजीवनी नाईक (माणगाव २, गोठोस देऊळवाडी), साक्षी साळगावकर (माणगाव १, आकेरी ग्रामपंचायत). वेंगुर्ले-विनया बोवलेकर (परुळे कर्ली), स्वराली नवार (तुळस, उभादांडा रामघाट), मनीषा दुधवडकर (परुळे कर्ली). सावंतवाडी-अनुष्का परब (आंबोली, चौकुळ गोणसाठवाडी), शीतल गावडे (निरवडे २, नेमळे गावडेवाडी), वेदांती गावडे (आंबोली चौकुळ गोणसाठवाडी). दोडामार्ग-तनुजा आरभावी (दोडामार्ग, आयी किटवाडी), आदिती देसाई (मोरगाव, भिकेकोनाळ).