तुळस जैतीर देवाचा
बुधवारी वर्धापन दिन
वेंगुर्ले ः तुळस येथील श्री देव जैतीर देवाचा वर्धापन दिन सोहळा बुधवारी (ता. २) विविध कार्याक्रमांनी होणार आहे. सकाळी धार्मिक विधी, ८ वाजता लघुरुद्र, ९.३० वाजता श्रींची महापूजा, ८.३० वाजता श्री देव जैतीर पूजन, दुपारी १२.३० वाजता महाआरती, १ वाजता महाप्रसाद, सायंकाळी ४.३० वाजता जागृती, कस्तुरी, दिनेश तुळसकर, विजय तुळसकर यांचा सुगम संगीताचा बहारदार कार्यक्रम, ५.३० वाजता पंडित राजाराम आंबार्डेकर, बेळगाव यांचे नाट्य संगीत गायन, ७ वाजता अचानक भजन मंडळ वेंगुर्ले यांचे भजन, रात्री ८ वाजता तुळस गावातील प्रसिद्ध भजनी बुवांचे संयुक्त भजन, १० वाजता वालावलकर दशावतार नाट्यमंडळाचे पौराणिक नाटक होणार आहे. लाभ घ्यावा, असे आवाहन श्री देव जैतीर मंदिर देवस्थान मानकरी, तुळस गावातील ग्रामस्थ व देवस्थान उपसमितीने केले आहे.
---
माकडांच्या उपद्रवाने
मालवणवासीय त्रस्त
मसुरे ः संपूर्ण सिंधुदुर्ग जिल्ह्यात सध्या माकडांचा मोठ्या प्रमाणात उपद्रव वाढला असून जिल्ह्यातील काही भागात वनविभागाने माकडे पकडण्याची मोहीम सुरू केली होती; मात्र मालवण तालुक्यातील ग्रामीण भागात अजूनही या मोहिमेअंतर्गत माकडे पकडण्याची कार्यवाही झाली नसल्याने येथील शेतकरी, ग्रामस्थ या मोहिमेच्या प्रतीक्षेतच आहे. सध्या मालवण तालुक्यात काळ्या व लाल तोंडाच्या माकडांचा उपद्रव मोठ्या प्रमाणात वाढला आहे. काही गावात माकडांच्या उपद्रवाने शेतकऱ्यांनी शेतीही करणे सोडून दिले आहे. शासन व वनविभागाने माकडे पकड मोहीम राबविली; मात्र अजूनही ग्रामीण भागात हे पथक पोहोचले नसल्याचा आरोप ग्रामस्थांनी केला आहे.
......................
दाभोलीत १६ रोजी
महापुण्यतिथी उत्सव
वेंगुर्ले ः कुडाळदेशकर आद्य गौड ब्राह्मण ज्ञातीचे मूळ पीठ श्री मठ संस्थान दाभोली येथे प्रतिवर्षी होणारा श्री गुरू महापुण्यतिथी उत्सव १६ एप्रिलला पारंपरिक पद्धतीने साजरा होणार आहे. सर्व ज्ञातीबांधव व गुरुभक्तांनी या उत्सवास उपस्थित राहून गुरुसेवेचा लाभ घ्यावा. तसेच दरवर्षी होणारा सामुदायिक मौजीबंधन सोहळा यावर्षी ७ मे रोजी आयोजित केला आहे. इच्छुक ज्ञातीबांधवांनी श्री मठ संस्थान दाभोली ज्ञास कार्यालय येथे संपर्क साधावा, असे आवाहन विश्वस्त मंडळाने केले आहे.
---
वेंगुर्लेत रविवारी
वधू-वर मेळावा
सावंतवाडी ः सिंधुदुर्ग बौद्ध हितवर्धक महासंघ मुंबई शाखा कुडाळ, वेंगुर्ले, सावंतवाडी व दोडामार्ग तालुके आणि गोवा विभागांच्या संयुक्त विद्यमाने वधू-वर पालक मेळाव्याचे आयोजन ६ एप्रिलला सकाळी ९.३० ते ३.३० दरम्यान वेंगुर्ले सुंदर भाटले साई मंगल कार्यालय येथे केले आहे. वधू-वरांनी बौद्ध असल्याचा दाखला, वयाचा पुरावा व शैक्षणिक पात्रता यांच्या झेरॉक्स व पासपोर्ट फोटो सोबत आणणे आवश्यक आहे. विवाहोत्सुक वधू-वर व त्यांच्या पालकांनी उपस्थित राहावे, असे आवाहन केले आहे.