-rat३०p२६.jpg-
२५N५४४६८
रत्नागिरी ः शोभायात्रेत सहभागी सजीव देखावा.
------
नरेंद्राचार्य महाराज संस्थानची शोभायात्रा
हिंदू नववर्ष स्वागत ; सजीव देखाव्यांचे आकर्षण
सकाळ वृत्तसेवा
रत्नागिरी, ता. ३० : जगद्गुरु नरेंद्राचार्य महाराज संस्थानतर्फे आज हिंदू नववर्षाचे औचित्य साधून रत्नागिरी शहरात भव्य अशी शोभायात्रा काढण्यात आली. लोकांचा सळसळता उत्साह, वाद्यांचा दणदणाट, डोक्यावर कलश घेतलेल्या महिला, ध्वजधारी महिला आणि पुरुष व शिस्त अशा थाटात निघालेल्या या चैतन्यदायी शोभायात्रेने रत्नागिरीकरांची सकाळ आनंददायी केली. या शोभायात्रेचे उद्योगमंत्री उदय सामंत यांनीही कौतुक केले.
रत्नागिरीसह महाराष्ट्रात ४५ शहरांत तर गोवा, गुजरात, तेलंगणा, मध्यप्रदेश छत्तीसगड, कर्नाटक या राज्यात मिळून ६२ शोभायात्रा आज काढण्यात आल्या. मराठी नववर्षाची सुरुवात होणारा हिंदूंचा हा महत्वाचा सण. त्यामुळे सर्वत्र हा सण उत्साहात साजरा झाला. त्यात जिल्हाभरातून आलेले स्वस्वरूप संप्रदायाचे लोक, नागरिक मोठ्यासंखेने व नटूनथटून सहभागी झाले होते. सकाळी सात वाजता मारूतीमंदिर चौकातील छत्रपती शिवाजी महाराज यांच्या पुतळ्याला पुष्पहार घालून मिरवणूक सुरू झाली. भारतीय संस्कृतीचे दर्शन त्यात घडविणारे अनेक चित्ररूप व सजीव देखावे सहभागी होते. त्यात समाजप्रबोधन करणारे, वैभवशाली इतिहासाला उजाळा देणारे, संतांची थोर परंपरा दाखवणारे देखावे होते. तसेच ढोल पथक, भजन, वाद्यवृंद सहभागी होता. ते सर्वांचे लक्ष वेधून घेत होते. वाटेत मिरवणुकीतील लोकांसाठी पिण्याच्या पाण्याची व्यवस्था होती. शहरातील प्रमुख मार्गावरून फिरून दुपारी श्रीराम मंदिर इथे सांगता झाली. तिथे पूजा, आरती झाली. श्रीराम मंदिर अध्यक्षा सौ. उर्मिला घोसाळकर यांनी सर्वांचे स्वागत केले.