गोमांस वाहतूक प्रकरणी ‘त्या’ संशयितास कोठडी

सकाळ वृत्तसेवा
सावंतवाडी, ता. ३० ः गोमांस वाहतूक प्रकरणी सावंतवाडी पोलिसांनी मोहम्मद सर्फराज भाऊद्दीन ख्वाजा (वय ४५, रा. सावंतवाडी बाहेरचावाडा) याच्यावर काल (ता.२९) रात्री उशिरा अटकेची कारवाई केली. त्याला आज सकाळी न्यायालयात हजर केले असता न्यायालयाने त्याला तीन दिवसांची पोलीस कोठडी सुनावली.
माडखोल येथे हिंदू संघटनांच्या कार्यकर्त्यांनी काल ख्वाजा याला त्याच्या मोटारीतून गोमांसाची अवैध वाहतूक करत असताना त्याला पकडून पोलिसांच्या स्वाधीन केले होते. या कारवाईत पोलिसांनी गुन्ह्यात वापरलेली २ लाख रुपये किंमतीची मोटार, १० हजारांचा मोबाईल, ३३ हजार रुपये रोख रक्कम आणि ३८ हजार ११५ रुपये किंमतीचे गोमांस असा एकूण २ लाख ८१ हजार ११५ रुपये किंमतीचा मुद्देमाल जप्त केला होता. त्यानंतर याप्रकरणी पोलिसांनी ख्वाजा याच्याविरुद्ध गुन्हा दाखल करून त्याला अटक केली होती. त्यानंतर आज त्याला येथील न्यायालयात हजर करण्यात आले. पोलिसांनी न्यायालयात संशयिताने हे मांस कुठून आणले? आणि या गुन्ह्यात त्याचे अन्य कोणी साथीदार आहेत का? याचा तपास करण्यासाठी सात दिवसांची पोलिस कोठडी मिळावी, अशी मागणी केली होती. त्यानुसार न्यायालयाने संशयिताला २ एप्रिलपर्यंत पोलिस कोठडी सुनावली. या प्रकरणाचा अधिक तपास सुरू आहे.