चिपळुणातील दोन धनगरवाड्यात टँकर
प्रशासनाची पाहणी ; ११ गावातून टॅंकरची मागणी
सकाळ वृत्तसेवा
चिपळूण, ता. ५ ः तालुक्यातील पाणीटंचाईची सर्वाधिक झळ बसणाऱ्या धनगरवाड्यांना अखेर प्रशासनाने बुधवारपासून टँकर सुरू केला आहे. अडरे व टेरव या दोन गावांतील तहानलेल्या धनगरवाड्यांसाठी पहिल्यांदा टँकर धावला आहे. उर्वरित धनगरवाड्यांसह गाववाड्यांना अद्याप टँकरची प्रतीक्षा आहे.
तालुका प्रशासनाने टँकर सुरू करावा यासाठी कादवड, सावर्डे, आनारी, अडरे गावांतील धनगरवाड्यांतून सातत्याने मागणी केली जात आहे. यामुळे तहसीलदार, गटविकास अधिकारी व पाणीपुरवठा विभाग यांच्याकडून संयुक्तरित्या पाहणी केल्यानंतर अखेर बुधवारी अडरे व टेरव या दोन गावांतील धनगरवाड्यांसाठी टँकर धावला. आतापर्यंत ११ गावांतील वाड्यांमधून पाणी टँकरसाठीचे अर्ज दाखल झाले आहेत. पंचायत समितीने केवळ एका टँकर अधिगृहित केला. यामुळे उर्वरित वाड्यावस्त्यांना पाणी टँकर सुरू करायचे झाल्यास एका टँकरद्वारे टंचाईग्रस्तांची तहान भागवताना प्रशासनाला कसरत करावी लागणार आहे.