पूर शाळेत वृक्षारोपण
संगमेश्वर ः देवरूख येथील आठल्ये-सप्रे-पित्रे महाविद्यालयातील बी. व्होक. सस्टेनेबल अॅग्रीकल्चर विभागाच्यावतीने ग्रामीण कृषी कार्यानुभव या क्रमिक अभ्यासक्रमांतर्गत जागतिक वसुंधरादिनाचे औचित्य साधून पूर शाळेत वृक्षारोपण करण्यात आले. विद्यार्थ्यांनी शालेय मुलांना पर्यावरणाचे महत्त्व, वृक्षांचे जीवनातील स्थान, हवामान बदलाचे परिणाम आणि नैसर्गिक संसाधनांचे शाश्वत व्यवस्थापन या विषयांवर मार्गदर्शन केले. शाळेच्या परिसरात वड, पिंपळ, आवळा आणि जांभूळ या उपयुक्त व पर्यावरणपूरक वृक्षांची लागवड करण्यात आली. वृक्षांची देखभाल करण्याची शपथ शाळेतील विद्यार्थी, पालक, शिक्षक व ग्रामस्थांनी घेतली. या वेळी मुख्याध्यापिका आरती भालेकर, शिक्षक राजेश सावंत, समीर मोहिते आणि वृषाली आगळे यांनी सहकार्य केले.