कणकवलीत मंगळवारी
जिल्हा बुद्धिबळ स्पर्धा
कणकवली ः जोश बेवरटेक लि. कंपनी पुरस्कृत मे. चेतना ट्रेडर्स, मालवण - कट्टा व कणकवली येथील श्री चेस अकादमी यांच्या संयुक्त विद्यमाने मंगळवारी (ता. २९) येथील लक्ष्मी विष्णू हॉल येथे जिल्हा बुद्धिबळ स्पर्धेचे आयोजन केले आहे. विजेत्या स्पर्धकांना रोख रक्कम, मेडल व चषक देण्यात येणार असून सहभागी स्पर्धकांना प्रमाणपत्र देण्यात येईल. स्पर्धेत १८ वर्षांखालील मुले-मुली सहभागी होऊ शकतात. इच्छुकांनी आपली नावे २७ एप्रिलपर्यंत श्रीकृष्ण आडेलकर यांच्याकडे द्यावीत, असे आवाहन आयोजकांनी केले आहे.
......................
स्वरा, यथार्थ गवसचे
गुरुकुल परीक्षेत यश
मडुरा ः गुरुकुल एज्युकेशन सोसायटी कोल्हापूरतर्फे घेण्यात आलेल्या गुरुकुल प्रज्ञाशोध परीक्षेत (जीटीएस) २०२४-२५ मध्ये मडुर शाळा नं. २ ची पहिलीमधील विद्यार्थिनी स्वरा गावडे व वाफोली शाळा नं. १ चा पहिलीतील विद्यार्थी यथार्थ गवस यांनी गणित विषयात यश मिळवले. स्वरा गावडे हिने जिल्ह्यात पाचवा, तर राज्यात दहावा क्रमांक मिळवत गणित विषयात ८२ टक्के गुण मिळवले. तर यथार्थ गवस याने गणित विषयात जिल्ह्यात व राज्यात पंधरावा क्रमांक मिळवत ७२ टक्के गुण मिळविले. सावंतवाडी तालुक्यातील दोन्ही विद्यार्थ्यांचे तसेच इतर सर्व उत्तीर्ण विद्यार्थ्यांचे यशाबद्दल कौतुक होत आहे.