62673

भगवती देवी डाळपस्वारीस
मुणगे येथे उत्साहात प्रारंभ
सकाळ वृत्तसेवा
मुणगे, ता. ९ः येथील देवी भगवतीच्या डाळपस्वारीस गुरुवारपासून (ता. ८) सुरुवात झाली. सायंकाळी साडेचार वाजता देवी भगवती तरंग व रयतेच्या लवाजम्यासह भगवती मंदिरातून डाळपस्वारीस निघाली. देवी भगवतीचा त्रैवार्षिक डाळपस्वारी सोहळा सुरू झाला असून रविवारपर्यंत (ता. ११) गावातील वाडीवाडीमध्ये देवस्थळांना भेटी देणार आहे.
गुरुवारी सायंकाळी साडेचार वाजता भगवती देवी तरंगासह रयतेसमवेत बांबरवाडी येथील देव पाटील येथे आगमन झाले. फटाक्यांच्या आतषबाजीत देवीसह रयतेचे जल्लोषात स्वागत करण्यात आले. बांबरवाडी मंडळाच्या वतीने भाविकांना सरबत आणि उपमाचे वाटप करण्यात आले. वाडीतील ग्रामस्थांच्या देवीची ओटी भरणे व तळीचा कार्यक्रम झाल्यानंतर तेथून बांबरवाडी येथील गणपत दळवी यांच्या घराजवळ थांबविण्यात आले.
गणपत दळवी व मंडळाच्या वतीने खाऊ वाटप करण्यात आले. तेथून देवी बायची मंदिर येथे आगमन झाले. दळवी मंडळाच्या वतीने भाविकांना प्रसाद वाटप करण्यात आले. देवी बायची मंदिर येथे रात्री मुक्काम करून उद्या (ता. ९) सकाळी बायची देवीची अभिषेक, पूजा व नैवेद्य करून देवीस पुढे मार्गस्थ होण्यासाठी कौलप्रसाद लावण्यात येणार आहे.