वळवाचा महावितरणला दणका
वीजपुरवठा वारंवार खंडीत ; सर्वसामान्य त्रस्त
सकाळ वृत्तसेवा
राजापूर, ता. ११ ः गतवर्षी मॉन्सूनच्या आगमनावेळी महावितरणचा पुरता बोजवारा उडाला होता. अनेक भागात चार ते पाच दिवस वीजपुरवठा खंडीत झालेला होता. या अनुभवातून धडा घेऊन यंदा पावसाळ्यात राजापूरकरांना अखंडीत वीजपुरवठा होईल अशी राजापूरकरांची अपेक्षा होती. पण पावसाळा तोंडावर आला तरीही महावितरण सज्ज झालेले नाही. गेल्या दोन-तीन दिवसात तालुक्याच्या विविध भागात झालेल्या वळवाच्या पावसाने अनेक भागातील वीजपुरवठा खंडीत झाल्याने सर्वसामान्य त्रस्त झाले आहेत. लग्नसराईत वीजपुरवठा खंडीत होत असल्यामुळे वऱ्हाडी मंडळींसह व्यापारीही त्रस्त झाले आहेत. गेले आठ महिने दर सोमवारी देखभाल दुरुस्तीसाठी बंद केल्या जाणाऱ्या वीज पुरवठ्यामुळे महावितरणने नेमकी कसली दुरुस्ती केली असाही प्रश्न उपस्थित केला जात आहे.