- ratchl१५३.jpg-
२५N६३९८३
साईराज गुढेकर
-----
वडिलांच्या निधनानंतरही परीक्षा देत उत्तुंग यश
साईराज गुढेकरचे कौतुक; आईच्या डोळ्यात आनंद अश्रू
सकाळ वृत्तसेवा
चिपळूण, ता. १५ : कर्करोगाशी झूंज देणाऱ्या वडिलांचे छत्र दहावीचे पेपर सुरू असतानाच हरपलं अन्‌ आभाळाएवढं दु:ख गिळत तो मोठ्या हिंमतीने परीक्षेला सामोरा गेला. विशेष म्हणजे या परीक्षेत त्याने अभूतपूर्व यश संपादन करत आपल्या वडिलांना अनोख्या पद्धतीने श्रद्धांजली वाहिली. युनायटेड इंग्लिश स्कूलमध्ये द्वितीय येण्याचा मान पटकावणाऱ्या साईराज गुढेकर या विद्यार्थ्याने आपल्या कौटुंबिक कठीण प्रसंगातूनही सावरत चक्क ९७.४० टक्के गुण मिळवले. निकाल घेऊन घरी आलेल्या साईराजला पाहताच आईचा अश्रूंचा बांध फुटला.
साईराज हा लहानपणापासूनच हुशार आहे. आठवीच्या शिष्यवृत्ती परीक्षेत त्याने यश मिळवत शिष्यवृत्ती प्राप्त केली होती तसेच नववीमध्ये घेण्यात आलेल्या होमीभाभा बालवैज्ञानिक परीक्षेत त्याने लेखी परीक्षेत गुणवत्ता यादीत येऊन प्रॅक्टिकल परीक्षेस बसण्यास तो पात्र झाला होता. २०२४ मध्ये बुद्धिबळ शालांतर खेळामध्ये घेण्यात आलेल्या स्पर्धेत त्याची विभागीय स्पर्धेसाठी निवड झाली होती. या स्पर्धेचाही त्याला १०वीच्या गुणामध्ये फायदा झाला.
साईराजची दहावीची परीक्षा चालू असतानाच त्याच्या वडिलांचे निधन झाले. तरीही त्याने चिकाटीने अभ्यासाकडे दुर्लक्ष न करता ९७.४० टक्के मिळवून शाळेत दुसरा क्रमांक मिळवण्याचा मान पटकावला. त्याच्या यशामध्ये त्याची आई वीणा गुढेकर, वडील (कै.) विजय गुढेकर, शिक्षकांचा खूप मोलाचा वाटा आहे. वडिलांप्रमाणेच त्याचेही अभियंता होण्याचे स्वप्न आहे. त्याला विज्ञान विषयाची खूप आवड आहे.