64424

कनिष्ठ लिपिक भरतीमध्ये
स्थानिकांना प्राधान्य द्यावे

कोटकामतेवासीयांची मागणी

सकाळ वृत्तसेवा
मुणगे, ता. १७ ः कोटकामते (ता. देवगड) येथील श्री भगवती माध्यमिक विद्यालयामध्ये कनिष्ठ लिपिक पदासाठी चालू असलेल्या भरती प्रक्रियेत गावातील स्थानिक, पात्र व सुशिक्षित उमेदवारास प्राधान्य द्यावे, अशी मागणी ग्रामस्थांनी निवेदनाद्वारे प्रशालेचे मुख्याध्यापक यांच्याकडे केली आहे.
कोटकामते येथील माध्यमिक विद्यालयामध्ये कनिष्ठ लिपिक पदासाठी भरती प्रक्रिया सुरू आहे. या भरती प्रक्रियेसंदर्भात ग्रामस्थांनी एक निवेदन विद्यालयाचे मुख्याध्यापक व अध्यक्ष यांना दिले. या निवेदनावर एकूण ८५ ग्रामस्थांच्या स्वाक्षरी आहेत. यावेळी सरपंच ऋतुजा खाजणवाडकर, उपसरपंच गणेश घाडी, माजी उपसरपंच विजय कुडपकर, माजी तंटामुक्ती अध्यक्ष तुकाराम राऊळ यांची प्रमुख उपस्थिती होती. ग्रामस्थांनी दिलेल्या निवेदनात म्हटले आहे की, ‘‘गावातील उमेदवार आवश्यक शैक्षणिक व तांत्रिक पात्रता असलेले, प्रामाणिक, कर्तव्यदक्ष व शिस्तप्रिय आहेत. गावाच्या विकासात स्थानिक युवकांचा सहभाग वाढावा व रोजगाराच्या संधी निर्माण व्हाव्यात, यासाठी स्थानिक उमेदवारास संधी देणे आवश्यक आहे.’’