64654

सिनेकलाकारांचा लवकरच
सिंधुदुर्गात विशेष कार्यक्रम

नीतेश राणे ः पर्यटनवृद्धीसाठी प्रयत्न

सकाळ वृत्तसेवा
कणकवली, ता. १८ ः ‘पालकमंत्री, तसेच बंदर विकास व मत्स्य व्यवसाय मंत्री नीतेश राणे यांच्या विशेष प्रयत्नांतून हिंदी चित्रपटसृष्टीतील कलाकारांचा विशेष कार्यक्रम होणार आहे. पुढील वर्षी कार्यक्रमाचे आयोजन होणार असून एका खासगी वाहिनीचा पुरस्कार वितरण सोहळा जिल्ह्यात होणार आहे. संबंधित व्यवस्थापनाकडून नुकतीच ही अधिकृत घोषणा करण्यात आली,’ अशी माहिती श्री. राणे यांनी दिली.
कार्यक्रमाची प्राथमिक माहिती देण्यासाठी एक व्हिडिओ प्रसारित केला आहे. यात श्री. राणे यांनी नमूद केले आहे की, या निर्णयामुळे सिंधुदुर्गचे पर्यटन क्षेत्र आणखी वेगाने विकसित होण्यास चालना मिळणार आहे. या घोषणेदरम्यान स्क्रीनवर मालवण येथील छत्रपती शिवाजी महाराजांचा पुतळा, तसेच सिंधुदुर्गातील विविध सुंदर पर्यटन स्थळांचे दर्शन घडवण्यात आले. उपस्थितांनी त्याला भरभरून प्रतिसाद दिला. या पुरस्कार सोहळ्याच्या मागील वर्षीच्या कार्यक्रमासाठी राणेही उपस्थित होते. तेव्हापासूनच त्यांनी सिंधुदुर्गात हा कार्यक्रम घेण्याचा प्रयत्न सुरू केला होता. हा कार्यक्रम नेमका कोठे व कधी होणार, याची सर्वांनाच उत्सुकता लागली आहे. स्थानिक नागरिक व पर्यटन व्यावसायिकांच्या मते, सिंधुदुर्गात खासगी वाहिनीचा राष्ट्रीय पातळीवरील कार्यक्रम आयोजित करून पालकमंत्री राणे यांनी पर्यटनाच्या क्षेत्रात एक ऐतिहासिक टप्पा गाठायचा प्रयत्न आहे.