कुडाळात उद्या
‘उमेद’ मेळावा
कुडाळ ः महाराष्ट्र राज्य ग्रामीण जीवनोन्नती अभियानांतर्गत महिलांतर्फे बुधवारी (ता. २१) वासुदेवानंद हॉल, कुडाळ येथे सकाळी १० ते दुपारी २ या वेळेत उमेद महिला मेळावा आयोजित केला आहे. मेळाव्याला पालकमंत्री नीतेश राणे, आमदार नीलेश राणे, मुख्य कार्यकारी अधिकारी रवींद्र खेबुडकर, जिल्हा अभियान प्रकल्प संचालक उदय पाटील, गटविकास अधिकारी वासुदेव नाईक, अभियान व्यवस्थापक वैभव पवार, तालुका अभियान व्यवस्थापक गणेश राठोड यांची प्रमुख उपस्थिती आहे. सर्वांनी उपस्थित राहावे, असे आवाहन नेरुर, प्रभाग संघ अध्यक्ष सोनाली चव्हाण, पिंगुळी प्रभाग संघ अध्यक्ष साधना माडये, तेंडोली-प्रभाग संघ अध्यक्ष श्रेया मोर्ये, पावशी प्रभागसंघ अध्यक्ष सुनिधी सावंत, वेताळबांबर्डे प्रभाग संघ अध्यक्ष रोहिणी कुपेरकर, माणगाव-प्रभाग संघ अध्यक्ष शबनम नाईक, आंब्रड प्रभाग संघ अध्यक्ष प्राची दळवी, ओरोस प्रभाग संघ अध्यक्ष साक्षी गोसावी तसेच ‘उमेद’ महाराष्ट्र राज्य महिला व कर्मचारी संघटना अध्यक्ष उषा नेरुरकर, उपाध्यक्ष सोनाली सावंत, सचिव रंजना मेस्त्री यांनी केले आहे.
------
‘महारुद्र स्वाहाकार’
मालवणात उत्साहात
मालवण ः श्री सद्‌गुरू सदानंद माऊली महाराज संप्रदायातर्फे संप्रदाय प्रमुख विलास (बापूजी) झाड यांच्या मार्गदर्शनाखाली श्री क्षेत्र दत्तमंदिर, वायरी बांध, मालवण येथे महारुद्र स्वाहाकार उत्साहात आणि भक्तिमय वातावरणात झाला. या कार्यक्रमाला अनेक ठिकाणच्या भाविकांनी उपस्थिती दर्शविली. सकाळपासूनच मंदिरात अभिषेक, पूजन आणि महारुद्र स्वाहाकार, महाआरती ब्रह्मवृंदाच्या साथीने मंत्रोच्चारांच्या गजरात झाली. विलास झाड यांनी उपस्थितांना अध्यात्माचे महत्त्व पटवून सांगितले. त्यांनी सदानंद माऊली महाराजांच्या शिकवणुकीवर प्रकाश टाकला आणि भक्तिमार्गाचे महत्त्व विशद केले. त्यांच्या प्रेरणादायी वाणीने भाविकांना नवी ऊर्जा मिळाली. या कार्यक्रमाच्या यशस्वी आयोजनात संप्रदायाच्या भक्तशिष्य वर्गाने महत्त्वपूर्ण योगदान दिले. दोन दिवस चाललेल्या या धार्मिक कार्यक्रमात सहभागी झालेल्या भाविकांसाठी महाप्रसादाची व्यवस्था केली होती.
---------
वेंगुर्लेत गुरुवारपासून
मूर्ती पुनर्प्रतिष्ठापना
वेंगुर्ले ः येथील देव रामेश्वर मंदिर परिसर सुशोभीकरण कार्याअंतर्गत देव रामेश्वरच्या कौलप्रसादाप्रमाणे नवीन जागेत राम-सीता देवतांच्या मूर्तीची पुनर्प्रतिष्ठापना सोहळा २२ व २३ मे रोजी होणार आहे. यानिमित्त गुरुवारी (ता. २२) सकाळी ८ वाजता जलाधिवास, ग्रहयजन, वास्तुयजन व विविध धार्मिक कार्यक्रम, आरती व तीर्थप्रसाद, शुक्रवारी (ता. २३) सकाळी ८ वाजता स्थळप्राकार, शुद्धी, आवाहित देवता पूजन, प्रधानहोम, ११.५५ वाजता कलशारोहण, दुपारी १२.०५ वाजता श्रीराम-सीता यांची पुनर्प्रतिष्ठापना, तत्त्वास प्राणप्रतिष्ठा, महापूजा, बलिदान, पूर्णाहुती, आरती व तीर्थप्रसाद, सायंकाळी ७ वाजता वेंगुर्ले शाळा क्र. ४ च्या आजी-माजी मुलींचे ‘श्री राम दर्शन’ हे पौराणिक दशावतारी नाटक होणार आहे. या कार्यक्रमांचा व तीर्थप्रसादाचा लाभ घ्यावा, असे आवाहन विश्वस्त मंडळ श्री रामेश्वर देवस्थान ट्रस्टने केले आहे.
..................
कुडाळ वाचनालयात
गुरुवारी ग्रंथ प्रदर्शन
कुडाळ ः येथील रा. ब. अनंत शिवाजी देसाई वाचनालय व ग्रंथसंग्रहालयातर्फे (जिल्हा ग्रंथालय) राजा राममोहन रॉय यांच्या जयंतीनिमित्त गुरुवारी (ता. २२) सकाळी ९.३० वाजता वाचनालयाच्या सभागृहात हिंदी व इंग्रजी भाषेतील ग्रंथांचे प्रदर्शन आयोजित केले आहे. हे प्रदर्शन सकाळी ९ ते सायंकाळी ७ या वेळेत सर्वांसाठी खुले राहणार आहे. अधिकाधिक नागरिकांनी लाभ घ्यावा, असे आवाहन ग्रंथालयाचे अध्यक्ष अरविंद शिरसाट यांनी केले आहे.