भगवा कोणीही खाली खेचू शकणार नाही
संतोष थेराडे ः आंबेडमध्ये ठाकरे गटाची सभा
सकाळ वृत्तसेवा
संगमेश्वर, ता. २० ः कोणी कितीही प्रयत्न केला तरीही छत्रपती शिवरायांचा आणि शिवसेना उद्धव बाळासाहेब ठाकरेंचा भगवा कोणीही खाली खेचू शकणार नाही तसेच आम्ही सर्व पदाधिकारी कार्यकर्त्यांबरोबर आहोत, असे प्रतिपादन जिल्हा संघटक संतोष थेराडे यांनी केले.
शिवसेना उद्धव बाळासाहेब ठाकरे पक्षाच्या कसबा जिल्हा परिषद गटाच्या आंबेड येथे झालेल्या बैठकीत बोलत होते. या वेळी संगमेश्वर-चिपळूण विधानसभा संपर्कप्रमुख सुरेश कदम, जिल्हाप्रमुख दत्ता कदम, तालुका संपर्कप्रमुख पड्याळ, तालुकाप्रमुख बंड्या बोरूकर आदी उपस्थित होते. तालुकाप्रमुख नंदादीप बोरूकर यांनी सांगितले, जे गेले ते नेते होते; पण कार्यकर्ते तिथेच आहेत. मग शिवसेना संपली म्हणतात ते कस काय? आज येथे मोठ्या संख्येने शिवसैनिक येतोय म्हणजे आपले अस्तित्व जिवंत आहे, हेच दिसते. शिवसैनिकदेखील जागा आहे.
जिल्हाप्रमुख दत्ता कदम म्हणाले, तळागाळातील कट्टर शिवसैनिकांपर्यंत पोहचून त्यांच्या व्यथा जाणून घ्या, असे पक्षप्रमुख उद्धव ठाकरे यांचे म्हणणे आहे. त्यासाठी संपर्क अभियान चालू केले आहे. कार्यकर्त्यांच्या मनात काय आहे हे जाणून घ्या. आजपर्यंत या जिल्ह्यात भगवा हा तुम्ही-आम्ही फडकवत होतो. मग गेलेल्या गद्दारांना त्यांची जागा दाखवून भगवा फडकवत ठेवूयात तसेच खऱ्या अर्थाने महाराष्ट्र वाचवण्याचे काम कोणी केलं असेल तर ते म्हणजे उद्धव बाळासाहेब ठाकरे यांनी केले आहे. युती सरकारने महाराष्ट्र तसेच मुंबई बकाल करण्याचे काम केले. आज खऱ्या अर्थाने उद्धव ठाकरेंच्या पाठीशी उभे राहणे हे आपले काम आहे आणि आपण शिवसेना उद्धव बाळासाहेब ठाकरे पक्षाचा भगवा फडकत नाही तोपर्यंत शांत बसू नका.