rat23p3.jpg-
65741
रत्नागिरीः मुख्य प्रशिक्षक लक्ष्मीकांत पांडे यांच्या मार्गदर्शनाखाली झालेल्या शिबिराच्या समारोपावेळी अर्जुन गद्रे व तळेकर यांच्या हस्ते प्रमाणपत्र देऊन गौरवण्यात आले.

सर्व ऋतूंमध्ये क्रिकेट टर्फचा लाभ घ्यावा
अर्जुन गद्रे; उन्हाळी क्रिकेट शिबिराचा समारोप
सकाळ वृत्तसेवा
रत्नागिरी, ता. २३ : प्रशिक्षणार्थींनी आपले प्रशिक्षण असेच सुरू ठेवावे. सर्व ऋतूंमध्ये खेळण्यासाठी वापरता येईल, असे सुसज्ज इनडोअर क्रिकेट टर्फचा जास्तीत जास्त खेळाडूंनी लाभ घ्यावा, असे आवाहन गद्रे मरिन एक्स्पोर्ट प्रायव्हेट लिमिटेडचे व्यवस्थापकीय संचालक अर्जुन गद्रे यांनी केले.
गद्रे मरिन एक्स्पोर्ट प्रा. लि आणि रत्नागिरी जेट्स यांच्या संयुक्त विद्यमाने रत्नागिरीतील कसोप येथील सर्वंकष विद्यामंदिरात आयोजित उन्हाळी क्रिकेट शिबिराच्या सांगता कार्यक्रमावेळी ते बोलत होते. उन्हाळी क्रिकेट शिबिर २१ एप्रिल ते २० मे या कालावधीत घेण्यात आले. या शिबिरामध्ये ६५ खेळाडूंनी सहभाग नोंदवला होता. शिबिरादरम्यान क्रिकेट खेळातील बारकावे, बॅटिंग, बॉलिंग, फिल्डिंगमध्ये प्रावीण्य मिळवण्यासाठी आवश्यक सराव यासोबतच शारीरिक तंदुरुस्ती याकडेही प्रशिक्षकांनी बारकाईने लक्ष दिले.
शिबिरामध्ये सहभागी झालेल्या खेळाडूंना त्यांच्या क्षमता, त्यांच्या उणीवा जाणून घेऊन वैयक्तीक मार्गदर्शन देण्यात आले. प्रत्येक खेळाडूच्या गरजा समजून घेऊन त्यांना शिबिरातून ते देण्याचा प्रयत्न करण्यात आला. १० वर्षांच्या लहानात लहान खेळाडूंपासून १८ वर्षांपर्यंतच्या मोठ्या मुलांचा या शिबिरामध्ये सहभाग होता. त्यामुळे क्रिक्रेटच्या सरावाबरोबरच सांघिक जबाबदाऱ्या, सर्वांना सोबत घेऊन जाण्याची भावनादेखील या मुलांमध्ये निर्माण झाली. महिनाभर चाललेल्या या शिबिराची सांगता करण्यात आली.
या वेळी गद्रे मरिनचे व्यवस्थापकीय संचालक गद्रे यांनी प्रशिक्षणार्थींचे अभिनंदन केले. या वेळी गद्रे मरिनचे चिफ ऑपरेटिंग ऑफिसर अभिजित तळेकर, जेट्स रत्नागिरीचे अमित, सर्वंकष विद्यामंदिरचे नवीन सावंत, अॅडमिनिस्ट्रेटर राधा करमरकर आदी उपस्थित होते.