पायाची ‘सांधेरोपण’ शस्त्रक्रिया यशस्वी
सकाळ वृत्तसेवा
रत्नागिरी, ता. २४ : येथील शासकीय वैद्यकीय महाविद्यालय व जिल्हा रुग्णालयाने वैद्यकीय क्षेत्रात आणखी एक महत्वपूर्ण यश संपादन केले. डॉक्टरांच्या पथकाने रंजना जोशी (वय ६८) यांच्यावर पायाची यशस्वी कृत्रिम सांधरोपण शस्त्रक्रिया केली.
जोशी यांना गेल्या १५ वर्षापासून वातामुळे गुढघेदुखीचा त्रास होता. तसेच दोन्ही पायांना बाक असल्यामुळे उभे राहणे व आधाराशिवाय चालता येणे शक्य नव्हते. शासकीय वैद्यकीय महाविद्यालय व रुग्णालय येथे अस्थिरोग तज्ज्ञ डॉ. निखिल देवकर यांनी डाव्या पायाची कृत्रिम सांधेरोपण शस्त्रक्रिया यशस्वीरित्या केली होती. त्यानंतर १७ मे २०२५ ला उजव्या पायाचीदेखील कृत्रिम सांधेरोपण शस्त्रक्रिया यशस्वीरित्या पार पडली. शस्त्रक्रियेनंतर दोन दिवसांनी संबंधित रुग्णास चालणे-फिरणे शक्य झाले. तसेच पायाचा बाक नाहीसा झाल्यामुळे चालणे अगदी सुलभ झाले. दोन्ही पायाची किचकट व खर्चिक अशी कृत्रिम सांधेरोपण शस्त्रक्रिया पार पडली. जोशी यांनी रुग्णालयात मिळालेल्या योग्य सेवेबद्दल समाधान व्यक्त केले आहे.