तुटलेल्या वीज वाहिनीचा
धक्का लागून बैलाचा मृत्यू
मांगवलीतील घटना ः शेतकऱ्याचे ४० हजारांचे नुकसान
सकाळ वृत्तसेवा
वैभववाडी, ता. २५ ः मांगवली येथे तुटलेल्या वीज वाहिनीचा धक्का बसल्यामुळे बैलाचा मृत्यू झाला आहे. ही घटना शुक्रवारी (ता. २३) सकाळी घडला. खरीप हंगाम सुरू होण्याआधी मांडवकरवाडी येथील यशवंत भास्कर नाटेकर या शेतकऱ्याचे सुमारे ४० हजार रुपयांचे नुकसान झाले आहे.
श्री. नाटेकर यांनी बैल चरावयास सोडला होता. तो जवळच असलेल्या ढवळे यांच्या परड्यात गेला होता. हे कुटुंब कोल्हापूरला वास्तव्यास आहेत. त्यामुळे त्यांचे घर बंद असते. ढवळे यांच्या परड्यात विजेचा खांब असून तो पूर्णतः वाकलेल्या स्थितीत आहे. याकडे वीज वितरणने दुर्लक्ष केल्याने तो त्याच अवस्थेत आहे. तेथील वीज वाहिन्या तुटून पडल्यामुळे बैलाचा त्यांच्याशी संपर्क आल्याने बैल जागीच मृत्यूमुखी पडला. ही घटना सकाळी ढवळे यांच्या घराजवळून जाणाऱ्या ग्रामस्थाच्या निदर्शनास आली. त्यांनी याची माहिती नाटेकर यांना दिली. त्यांनी घटनास्थळी जाऊन खात्री केल्यानंतर सरपंच व पोलिसपाटील यांना कल्पना दिली. या घटनेची माहिती मिळताच वीज वितरणचे अधिकारी तसेच सरपंच शिवाजी नाटेकर, पशुवैद्यकीय अधिकारी पाटील, पोलिसपाटील कमलाकर लिंगायत यांनी घटनास्थळी जाऊ पंचनामा केला. ऐन शेती हंगाम सुरू होण्याआधीच त्यांच्यावर आपत्ती ओढवल्यामुळे वीज वितरण कंपनीने नाटेकर यांना तत्काळ नुकसान भरपाई द्यावी, अशी मागणी ग्रामस्थांनी केली.

सुदैवानेच मनुष्यहानी टळली
मांगवली येथील विद्युतभारित तारांची कोणालाच माहिती नव्हती. त्यामुळे मोठी दुर्घटना घडली असती. सुदैवाने मनुष्यहानी टळली असली तरी तालुक्यातील ग्रामीण भागातील गंजलेले व जीर्ण विजेचे खांब, जुन्या वीजवाहिन्या तातडीने बदलण्याची गरज निर्माण झाली आहे.