‘त्या’ साकव दुरूस्तीच्या हालचाली
ब्राह्मणदेव मंदिराजवळील घटना; अधिकाऱ्यांकडून पहाणी
सकाळ वृत्तसेवा
राजापूर, ता. २७ ः तालुक्यातील पेंडखळे येथील पेंडखळकरवाडीतील ब्राह्मणदेव मंदिराजवळील वहाळावर मोडकळीला आलेला लोखंडी साकव मुसळधार पावसामध्ये दोन दिवसांपूर्वी कोसळला आहे. याची तत्काळ दखल आमदार किरण सामंत यांनी घेत सदरचा साकव तत्काळ दुरूस्त करण्याचे निर्देश जिल्हा परिषद बांधकाम विभागाला दिले आहेत. तहसीलदार विकास गंबरे यांनी देखील या घटनेची दखल घेत कार्यवाही करण्याच्या सूचना दिल्या आहेत.
आमदार सामंत यांच्या सूचनेप्रमाणे, जिल्हा परिषद बांधकाम विभागाचे उपविभागीय अधिकारी भालचंद्र भालेकर यांनी तत्काळ घटनास्थळी भेट देऊन पाहणी करत सदरचा साकव दुरूस्त करण्याबाबत कार्यवाही सुरू केली आहे. तालुक्यातील पेंडखळे येथील पेंडखळकरवाडीतील ब्राह्मणदेव मंदिराजवळील वहाळावरील साकवाची पुरती दूरवस्था झाली होती. गेली तीन वर्षे या साकवाची दुरूस्ती करावी, अशी मागणी करून व ग्रामपंचायतीने ठराव करूनही संबंधित विभागाने लक्ष दिले नव्हते. दोन दिवसांपूर्वी झालेल्या मुसळधार पावसामध्ये हा साकव मोडून पडला. त्यामुळे ग्रामस्थांची मोठी गैरसोय झाली आहे. याची आमदार सामंत यांनी तातडीने दखल घेत जिल्हा परिषद बांधकाम विभागाला सदरच्या साकवाची पाहणी करून दुरूस्ती करण्याचे निर्देश दिले. त्याप्रमाणे जिल्हा परिषद बांधकाम विभागाने दखल घेत पाहणी करत सदरचा साकव तातडीने दुरूस्त करून देण्याबाबत कार्यवाही हाती घेतली आहे.