66568

बाजूपट्टीवर चिखल, अपघाताची भीती

कुडाळ पोस्ट कार्यालय दरम्यानची स्थिती; समस्या मार्गी लावण्याची मागणी

सकाळ वृत्तसेवा
कुडाळ, ता. २७ ः शहरात पोस्ट कार्यालय दरम्यानच्या रस्त्याच्या साईडपट्टीवर निर्माण झालेला चिखल प्रवाशी, वाहनचालकांना त्रासदायक ठरत आहे. अपघाताची भीती व्यक्त होत आहे. त्यामुळे ही समस्या त्वरीत मार्गी लावण्याची मागणी होत आहे.

येथील नगरपंचायतीतर्फे शहरातील कुडाळ पोलिस ठाणे ते जिजामाता चौक दरम्यानच्या मुख्य रस्त्यालगत आरसीसी नवीन गटार बांधणी व जलवाहिनीचे काम मागील काही दिवसापासून सुरू आहे. मात्र, अचानक सुरू झालेल्या मॉन्सूनपूर्व पावसामुळे या कामात अडथळा आल्यामुळे काम अर्धवटच राहिले. गटार व जलवाहिनीचे काम करीत असताना माती रस्त्यालगत टाकली होती. त्यामुळे या रस्त्याची बाजूपट्टी चिखलमय बनली आहे. पादचाऱ्यांना नाहक त्रास सहन करावा लागत आहे. नगरपंचायतीतर्फे पोलिस ठाणे ते जिजामाता चौक मुख्य रस्त्यालगत चर खोदाई करून नव्याने जलवाहिनी टाकली आहे. जलवाहिनी टाकून चर बुजविला. त्यानंतर रस्त्यालगत आरसीसी गटार बांधकाम हाती घेतले होते. या कामावेळी माती मुख्य रस्त्यालगत एका बाजूला टाकली होती. मात्र, अचानक सुरू झालेल्या मॉन्सूनपूर्व पावसामुळे हे काम अपूर्ण राहिले आहे. पावसाचा या कामात सतत व्यत्यय सुरू आहे. सध्या पोलिस ठाणे ते जिजामाता चौकापर्यंत एका बाजूने पूर्णपणे रस्त्याची बाजूपट्टी चिखलमय बनली आहे. तसेच या रस्त्याच्या बाजूपट्टीवर चारचाकी वाहने उभी केली जात आहेत. त्यामुळे तेथील भागात अजूनच दलदल निर्माण झाली आहे.
----
अर्धवट कामांचा परिणाम
पाऊस सुरु झाल्यापासून समस्या जैसे थे आहे. पादचाऱ्यांना चालणे त्रासदायक बनले आहे. त्यामुळे जास्तीत-जास्त पादचारी रस्त्याचा वापर करत आहेत. त्यामुळे एखाद्यावेळी अपघात होण्याची शक्यता नाकारता येत नाही. सध्या नागरिक व वाहनधारकांमधून नाराजी व्यक्त केली जात आहे. पाऊस सुरू होण्यापूर्वी या गटाराचे काम जोरात सुरू होते. मात्र, अचानक सुरु झालेल्या पावसामुळे या कामात अडथळे निर्माण झाले आहेत. तसेच ग्रामीण रुग्णालयानजीक मालवण मार्गावरील मोरीच्या तोंडावरील गटाराचे काम अर्धवट स्थितीत आहे. त्यामुळे त्याठिकाणीही पावसाचे पाणी साचले आहे.